Charter Document - 02194848

In nomine Domini nostri Jhesu Christi Amen Anno nativitatis ejusdem millesimo ducentesimo quadragesimo quinto pontificatus domini Innocentii pape quarti anno tertio indictione tertia mense julii die octavodecimo nos magister Gaufridus prior Podioleni monachus ordinis Cluniacensis et nos magister Petrus de Castris prior de Siura monachus Sancti Egidii electi arbitri arbitratores laudatores sententiatores statutores ordinatores ac amicabiles compositores a domino Willelmo abbate Cluniacensi pro se et monasterio suo ex parte una et a domino Pontio abbate monasterii Sancti Egidii Nemausensis diocesis pro se et monasterio suo ex altera super omni subjectione visitatione correctione reformatione procuratione reverentia de abbate assumendo de omnibus jurisdictionibus et aliis prout in instrumento compromissi per manus Noclerii scriniarii confecto plenius continetur sub pena in compromisso adjecta laudamus arbitramur sententiamus statuimus ac amicabiliter ordinamus ut abbas Cluniacensis possit in monasterio Sancti Egidii per se tantum visitare et hoc cum opus fuerit per evidentem ordinis monastici in monasterii Sancti Egidii lesionem Item laudamus arbitramur sententiamus statuimus ac amicabiliter ordinamus ut abbas Cluniacensis tenore suprascripto incorrectos possit in capitulo Sancti Egidii corrigere fratrum excessus secundum conditionem loci et hoc tantum ad clamorem alicujus monachi Sancti Egidii in capitulo coram omnibus factum vel ad clamorem abbatis si ipse excessum viderit possit etiam reformare observantiam ordinis in regularibus officinis scilicet oratorio capitulo dormitorio refectorio et claustro cum concilio tamen et assensu abbatis Sancti Egidii et majoris ac sanioris partis capituli ipsius Item laudamus arbitramur sententiamus statuimus ac amicabiliter ordinamus ut quotienscumque abbas Cluniacensis tenore suprascripto ad monasterium Sancti Egidii venerit cum suis honorifice procuretur processionaliter recipiatur ac honeste tractetur in necessariis et regularibus officinis ita tamen quod semel processionaliter receptus unica processione quamdiu vixerit sit contentus defuncto vero vel remoto Sancti Egidii abbate vel ad alium locum transmigrante si fratres monasterii Sancti Egidii pro abbate ad aliud monasterium transierint de nullo alio preterquam de Cluniacensi monasterio ipsis liceat assumere abbatem Item laudamus arbitramur sententiamus statuimus ac amicabiliter ordinamus ut cum abbas Cluniacensis tenore premisso ad monasterium Sancti Egidii venerit sedeat in sede abbatis Sancti Egidii scilicet in oratorio capitulo refectorio et claustro et possit facere superius memorata presente non absente abbate Sancti Egidii nisi forsan abbas Sancti Egidii post notitiam adventus abbatis Cluniacensis in fraudem probabiliter presumptam suam absentiam procuraret salvo ut abbas Cluniacensis et sui honorifice procurentur Item laudamus arbitramur sententiamus statuimus ac amicabiliter ordinamus ut omnia et singula supradicta tenore tamen et modo prescriptis faciat abbas Cluniacensis sine institutionibus et destitutionibus monachorum et personarum monasterii Sancti Egidi et sine mutatione ipsorum monachorum de loco ad locum et sine qualibet excommunicatione majori vel minori illis dumtaxat excommunicationum sententiis abbati Cluniacensi concessis quas beatus Benedictus in regula sua concedit Item laudamus arbitramur sententiamus statuimus ac amicabiliter ordinamus ut abbas Sancti Egidii omni casu exceptis processione procuratione sede et reverentia superius scripta a subjectione abbatis Cluniacensis perpetuo habeatur exemptus set abbas Cluniacensis ac ejus successores et conventus predictis perpetuo sint contenti nec occasione vel ratione alicujus juris scripti vel non scripti privilegii vel conventionis vel cujuslibet alterius juris seu rationis ab abbate et fratribus Sancti Egidii monasterii aliquid ultra predicta ullo umquam tempore petant cassata qualibet compositione seu conventione super hiis et aliis retroactis temporibus facta et privilegiis seu indulgentiis in eadem compositione seu conventione cassatis et abbas ac fratres Sancti Egidii Cluniacensibus non denegent supradicta Set si qua partium contra omnia predicta vel aliquod predictorum venerit incidat ipso facto in penam quingentarum marcarum argenti solvendam parti arbitrium servanti et pena soluta vel non nichilominus hoc arbitrium ordinatio seu statutum firmum et stabile tam pro dictis abbatibus quam pro eorum successoribus ac ipsorum conventibus perseveret Volumus etiam et mandamus utrumque abbatem ad majorem omnium et singulorum predictorum corroborationem huic nostre ordinationi sua sigilla et suorum conventuum apponere et si conventus eorundem vel alterius eorum sigillum proprium vel communem [non habuerit] loco sigilli conventus duorum episcoporum sigilla apponi procurent Quod arbitrium sponte et incontinenti utraque pars acceptavit et quod arbitrium scriberetur rogavimus per Noclerium publicum scriniarium partibus presentibus et consentientibus Latum est hoc arbitrium et recitatum per dictos arbitros superius nominatos Lugduni apud Sanctum Justum in domo Girini clerici coram hiis testibus scilicet domino Willelmo de Rossilione teste fratre Alberto teste et Stephano de Juniaco procuratore instituto in causa ista ab abbate et conventu Cluniacensi monachis ejusdem monasterii teste domino Bertrando Petri operario Sancti Egidii teste Bertrando de Montiliis teste domino Pontio priore de Cerverio monachis Sancti Egidii teste Willelmo Rostangni teste Johanne Pilia teste Ogerio Wasco testibus Rostangno de Margaritis teste et Bartholomeo Romanno teste + Ego frater Benedictus Dei permissione dictus episcopus Massiliensis juxta mandatum dictorum arbitrorum ad preces predictorum abbatum in hujus rei testimonium sigillum nostrum apponi feci et manu mea suprascripsi Ego Raimundus miseratione divina episcopus Nemausensis juxta mandatum predictorum arbitrorum ad preces predictorum abbatum in hujus rei testimonium sigillum nostrum apponi feci et per Willelmum de Loberia scriptorem nostrum subscribi Ego Noclerius auctoritate imperiali scrinarius prolationi hujus arbitrii interfui et ipsum de utriusque partis consensu scripsi et in publicam formam redegi et meo signo signavi