Charter Document - 02194847

In nomine Domini nostri Jesu Christi Amen Anno nativitatis ejusdem MCCXLV pontificatus domini Innocentii pape quarti anno tertio mense julii die sexto decimo in presentia mei Noclerii scriniarii et testium subscriptorum ad hoc specialiter vocatorum et rogatorum dominus Guillermus venerabilis abbas monasterii Cluniacensis cum consensu fratrum Henrici Johannis et Aimonis monachorum ejusdem ordinis qui presentes erant et dominus abbas monasterii Sancti Egidii Nemausensis diocesis cum consensu domini Poncii prioris de Cerverio domini prioris de Torsiaco et Bertranni de Monteliis monachorum ejusdem monasterii ex altera pro se et monasteriis ac successoribus suis obligantes se et fideliter promittentes quod ipsi procurabunt efficaciter omni modo quo poterunt quod conventus eorum subscripta omnia rata et firma habebunt compromiserunt pro se et monasteriis suis et eorum successoribus in religiosos viros scilicet in magistrum Gaufredum priorem Podioleni monachum ordinis Cluniacensis et in magistrum Petrum de Castris priorem de Siura monachum ejusdem monasterii Sancti Egidii super omni subjectione quam abbas et conventus Cluniacensis habet vel habere posset in prefatos abbatem et monachos monasterii Sancti Egidii predicti et super visitatione correctione reformatione procuratione reverentia et de abbate assumendo de monasterio illorum et de sessione abbatis Cluniacensis et institutione et destitutione et super omnibus aliis juribus subjectionibus et jurisdictionibus ac rationibus quas habent vel habere possent peterent seu petere possent abbas et conventus Cluniacensis predicti in prefato monasterio Sancti Egidii et abbate ac fratribus sicut dictum est tanquam in arbitros arbitratores laudatores statutores sententiatores ordinatores et amicabiles compositores dantes uterque eorum pro se et conventu suo plenam potestatem et quicquid ipsi semel vel pluries arbitrati fuerint seu laudaverint sententiaverint ordinaverint statuerint seu amicabiliter composuerint partibus presentibus vel absentibus citatis et non citatis die feriato et non feriato juris ordine servato vel non servato ratum et firmum pro se ac eorum successoribus et monasteriis et fratribus perpetuo habebunt nec in aliquo eorum contravenient sub pena quingentarum marcarum argenti solvenda parti a non servante servanti et totiens committatur in pena quotiens in aliquo capitulo ab aliqua partium contra fuerit factum et pena soluta nihilominus compromissum et arbitrium quod arbitrati fuerint seu statutum vel ordinatio in sua permaneant firmitate Dederunt etiam potestatem eisdem interpretandi et declarandi dubium seu questionem si ex eorum dictis oriretur Et hec omnia supradicti abbates promiserunt firmiter observare et adimplere et bona fide procurare quod conventus eorundem una cum eisdem sicut dictum est super predictis omnibus compromittant ac assentiant compromisso predicto et rata habeant que superius annotantur Preterea dicti abbates promiserunt bona fide apud dominum papam studiose et fideliter laborare ut ea que per predictos arbitros arbitrabuntur per litteras suas confirmabit Quod compromissum dicti magister Gaufridus prior Podioleni et magister Petrus de Castris prior de Siura uterque de mandato sui abbatis receperunt Actum Lugduni coram hiis testibus scilicet magistro Bartholomeo Venefrano teste Thomasino Brico teste Rostanno de Margaritis teste Johanne Pica et Ogerio Vasco testibus Johanne de Insula teste Guillermo Rostanni teste Bernardo Lurdo clerico teste Petro Ranulfo teste Ego Noclerius auctoritate imperiali scriniarius predictis omnibus interfui et hoc instrumentum de mandato utriusque abbatis scripsi et complevi rogatus