Charter Document - 02194838

Innocentius Episcopus servus servorum Dei dilectis filiis Abbati et Conventui Cluniac salutem et Apostolicam benedictionem Religionis vestre in qua de die in diem laudabiliter Domino cooperante proficitis meretur honestas ut vestris petitionibus a sede Apostolica favorabiliter annuatur illis precipue que sic pulsant cum moderamine animum preminentis quod intra exauditionis januam merito merentur admitti Vestra sane petitio nobis exhibita continebat quod cum Monasterium vestrum quod ejusdem sedis specialiter juris existit a primo sue fundationis exordio usque ad moderna tempora multis et diversis Romanorum Pontificum privilegiis et indulgentiis sit munitum et donatum libertatibus ab eisdem nonnulli Archiepiscopi et Episcopi et officiales eorum aliique Ecclesiarum Prelati non attendentes quod nobis principaliter injuriari probantur qui privilegia sedis Apostolice vel irreverenter impugnant vel superficialiter eorum verba tenentes contra ipsorum gestiunt intellectum venire et privilegiatos privilegiorum commodis privare conantur qui contra eadem privilegia et indulgentias ad Synodos et Conventus forenses vos ire compellunt ad domos vestras causa ordines celebrandi causas tractandi aliquos Conventus publicos convocandi et Missas celebrandi interdum accedunt ab Abbate vel Prioribus nullatenus invitati a fratribus etiam Cluniacensis Ordinis obedientiam exigere vel extorquere ac in ipsos ubilibet Commorantes jurisdictionem exercere interdicti et excommunicationis sententias proferre in Prioratibus et Cellis ejusdem Ordinis qui nunc sine Abbate Cluniacensi Monasterio sunt subjecti Abbates ordinare in Parochiis locorum eidem Monasterio subditorum absque Cluniacensis Abbatis assensu Ecclesias et Capellas construere Cemiteria benedicere de vestris Monasteriis et Monachis judicare ad judicia sua eos invitos pertrahere ac pro controversiis vestris in Parochianos homines et servientes vestros animadvertere presumentes quamquam Archiepiscopi vel Episcopi in quorum Diecesibus facultates vestre consistunt si contra eadem Monasteria vel Monachos ipsos aliquid questionis habuerint te fili Abbas tuosque successores ex indulto sedis Apostolice debeant appellare ac si lis per vos definiri nequiverit ad eamdem sedem referri ejus solius judicio terminanda Cum autem sit a predicta sede statutum ut omnes Ecclesie Capelle et Cemeteria vestra libera et immunia ab omni exactione consistant et fratres Cellarum seu locorum vestrorum ubilibet positorum pro interdictione et excommunicatione qualibet suspensione divinorum officiorum minime patiantur et tam Monachi predictorum locorum quam eorum famuli et qui se Monastice professioni devoverint divine servitutis officia celebrent et debita peragant sepulture iidem Prelati vos uti libere statuto hujusmodi non permittunt nec Diecesani Episcopi aut officiales eorum presentatos sibi a vobis ad Parochiales Ecclesias quas habetis sacerdotes admittunt nec celebrare in eis divina officia patiuntur eosdem prout vobis est ex Apostolice sedis benignitate concessum si dicti Episcopi vel officiales presentatos eosdem malitiose non duxerint admittendos Preterea cum ex indulgentia sedis ejusdem Ecclesiarum vestrarum decimas que a laicis detinentur si secundum Deum eorum potestati vestre subtrahere religionis reverentia poterit ad vestram et pauperum gubernationem vobis et ordini vestro liceat retinere ac Laicos vel Clericos seculares per loca vestra ad conversionem sive ad sepulturam suscipere nisi pro certis criminibus fuerint excommunicationis sententia innodati iidem super his vobis temere se opponunt alium quam Cluniacensem ordinem in Parochiis ad jus vestrum spectantibus de novo creare nihilominus presumentes licet ab eadem sede id fieri cuilibet inhibitum sit expresse Ad hec cum vos et fratres vestri ubilibet commorantes conveniri vel ultra duas dietas a Monasteriis vestris ad judicium pertrahi sive ad cujuslibet provisionem compelli per litteras Apostolicas non possitis nec alicui liceat auctoritate ipsarum in fratres ipsos jurisdictionem aliquam exercere nisi eedem littere plenam de ordine vestro et indulgentia vobis super his ab eadem sede concessa fecerint mentionem ipsi Prelati et alii a sede Apostolica delegati indulgentiam hujusmodi voluntate propria non servantes super iis vos sepius aggravant et perturbant Audivimus preterea quod non mediocriter movet nos nec modicum vestre derogat libertati quod aliqui Prelati Ecclesiarum et officiales eorum licet in vos et alios Ordinis Cluniacensis Monachos vel conversos ubilibet commorantes pro eo quod estis Apostolice sedis privilegiis et indulgentiis communiti eis non liceat excommunicationis aut interdicti sententiam promulgare in molentes tamen in molendinis et coquentes in furnis vestris in contrahentes vobiscum quibuscumque contractibus in servientes et famulos vestros in locantes eis vobis suas operas in illos etiam qui Missas vestras et horas vestras audiunt decimas redditus et oblationes ac alia vobis debita reddunt seu alias vobis communicant excommunicationis et interdicti sententias fulminare ac concessiones tam ab eorum predecessoribus quam aliis Christi fidelibus liberalitate pia et provida ordini vestro factas revocare propria auctoritate seu voluntate ne dicamus potius temeritate presumunt bona que in eorum continentur Diecesibus arrestari vel detineri tamdiu per violentiam facientes donec super his voluntati eorum fuerit satisfactum alia vobis gravamina et injurias multipliciter inferendo sicque fit ut exemptio concessa vobis causa solatii et quietis pariat vobis dispendium et laborem Quare nobis humiliter supplicastis ut tantis vestris gravaminibus et jacturis providere misericorditer curaremus Nos vero nolentes de cetero tam abusivas enormitates seu tam enormes abusus non absque sedis Apostolice excogitatas injuria sustinere hujusmodi excommunicationis et interdicti proferri sententiam et alia supradicta contra ejusdem sedis indulta in vestrum prejudicium fieri auctoritate presentium districtius inhibemus decernentes irritum et inane si quid contra inhibitionem hujusmodi super premissis fuerit attentatum Nulli ergo omnino hominum liceat hanc paginam nostre inhibitionis et constitutionis infringere vel ei ausu temerario contraire Si quis autem hoc attentare presumpserit indignationem omnipotentis Dei et beatorum Petri et Pauli Apostolorum ejus se noverit incursurum Datum Lugduni X Kalend Junii Pontificatus nostri anno secundo Habentur due executorie hujus Bulle ejusdem tenoris ac ipsa per quarum primam que est ejusdem diei Abbas sancti Luciani Belvacen per alteram vero que est de die xxxi ejusdem mensis Maii Abbas de Casa Dei executores seu conservatores committantur cum potestate compescendi molestatores appellatione postposita modo ultra tertiam vel quartam dietam extra Deicesim suam non trahantur