Charter Document - 02194837

Innocentius episcopus servus servorum Dei delecto filio magistro Guillelmo de Moreto capellano nostro canonico Carnotensi salutem et apostolicam benedictionem Sicut singula capiti suo membra necessarium et condignum convenit obsequium exhibere sic et singuli ecclesie generalis tam prelati quam subditi Romane debent ecclesie que caput existit in sue necessitatis articulo competenti subsidio subvenire Unde cum apostolica sedes per ea que in regnis populi Christiani pro ejusdem sedis subventione hactenus sunt collecta nondum a suorum onere debitorum que pro catholice fidei ecclesiastice libertatis et patrimonii sui defensione contraxit valeat relevari nos pro certo scientes quod ex parte ipsius sedis a dilectis filiis fratribus Cluniacensis ordinis nullum propter præmissa fuit adhuc subsidium postulatum et firmiter proponentes quantum cum Deo possumus loco et tempore intendere utilitatibus eorundem tria milia marcarum sterlingorum a predicti ordinis fratribus prout inter nos et venerabilem fratrem nostrum Lingonensem episcopum tunc Cluniacensem abbatem tractatu diligenti exinde habito deliberatum extitit propter hoc providimus exigenda Verum cum dilectus filius abbas Cluniacensis quem sincera in Domino caritate diligimus proposuerit in nostra præsentia constitutus quod monasterium Cluniacense alieni eris est onere multipliciter aggravatum nos erga illud pie gerentes compassionis affectum decimam omnium proventuum unius anni locorum ejusdem ordinis ubi libet positorum abbati et monasterio memoratis sic duximus concedendam ut tria milia marcarum ipsius decime in subventione apostolice sedis et totum residuum in solutionem debitorum præfati monasterii convertantur Ideoque discretioni tue per apostolica scripta mandamus quatinus a singulis abbatibus prioribus obedienciariis et quibuslibet aliis clericis et laicis qui loca ejusdem ordinis ubi libet posita ad monasterium ipsum mediate ac immediate spectantia optinent etiamsi ab archiepiscopis vel episcopis dictorum locorum aliqua teneantur exceptis illis de Anglia contra quos super eodem negotio executorem concessimus specialem decimam ipsam facias abbati predicto vel ejus nuntiis integre sine difficultate ac exceptione qualibet infra terminos et in locis que abbatibus prioribus et aliis supradictis prædixeris assignari contradictores si qui fuerint vel rebelles per censuram ecclesiasticam appellatione postposita compescendo non obstante privilegio vel indulgentia qualibet seu constitutione de duabus dietis edita in concilio generali Datum Lugduni XVI kalendas junii pontificatus nostri anno secundo