Charter Document - 02194816
| Charter Number: | 02194816 |
|---|---|
| Cartulary Title: | Recueil des Chartes de l'Abbaye de Cluny |
| Charter Language: | Latin |
| Charter Origin: | Religious |
| Charter Type(s): | Apology |
| Date: | 1244 |
| Date type: | Internal, A.D. |
| Resource Link(s): |
CCE: cartae cluniacenses electronicae |
Charter:
Reverendo in Christo patri ac domino H[ugoni] divina providentia venerabili abbati Cluniacensi frater Fulco humilis abbas Monasterii Novi Pictavensis totusque ejusdem ecclesie conventus salutem et obedienciam cum reverencia tam debitam quam devotam Cum ex vestri gracia nobis nuper transmiseritis per priorem nostrum de Faia Monachalis executionem privilegii a summo pontifice vobis indulti a venerabili archiepiscopo Viennensi sigillatam et propter litteram illam ex parte vestra nobis transmissam non possimus negocia vestra et nostra pariter expedire cum instanter ab adversis partibus petatur autenticum bullatum ut in medium proferatur paternitati vestre supplicamus quatinus nobis si placet privilegium bullatum per Stephanum capellanum et dilectum fratrem nostrum in Christo transmittatis Et quia procurationes quas nobis transmisistis non erant sufficientes sicut advocati nostri nobis asserebant vobis per dictum Stephanum transmisimus transcripta procurationum ut ea si placet sigillare velitis ut negocia nostra et vestra valeant cicius expediri Verum quia propter infirmitatem nostri corporis non possimus ad generale capitulum personaliter accedere paternitatem vestram humiliter exoramus quatinus excusationem nostram in hoc casu recipiatis si placet humiliter et benigne vobis humiliter supplicantes quatinus dicto fratri nostro super hiis et omnibus aliis que vobis ex parte nostra dixerit tamquam nobis credatis Bene et diu valeat paternitas vestra Anno Domini MCC quadragesimo quarto