Charter Document - 02194807
| Charter Number: | 02194807 |
|---|---|
| Cartulary Title: | Recueil des Chartes de l'Abbaye de Cluny |
| Charter Language: | Latin |
| Charter Origin: | Lay |
| Charter Type(s): | Grant |
| Date: | 1244 |
| Date type: | Internal, A.D. |
| Resource Link(s): |
CCE: cartae cluniacenses electronicae |
Charter:
Nos Sibilla domina Bellijoci notum facimus universis presentes litteras inspecturis quod cum nos de permissione et voluntate virorum religiosorum abbatis et conventus Cluniacensis domos Sancti Victoris et de Villanova ad ipsos pertinentes tenuerimus et adhuc teneamus volumus et concedimus ut post decessum nostrum dicte domus cum omnibus pertinenciis suis et omnibus meliorationibus quas in eisdem fecimus vel faciemus ad ecclesiam Cluniacensem quite et ab omni honere debitorum libere sine contradictione qualibet revertantur Volumus et concedimus ut tam mobilia quam immobilia que in supradictis domibus et earum pertinenciis acquisivimus vel acquiremus et que ibidem inventa fuerint postquam de nobis aliquid humanitus contigerit cedant in jus et proprietatem dictarum domorum et abbatis et conventus predictorum Si quis autem contra hoc venire voluerit maledictionem Dei et nostram incurrat Ut autem hoc firmum et stabile permaneat presentes litteras dictis abbati et conventui dedimus sigilli nostri munimine roboratas Datum anno Domini MCCXLIII mense januarii