Charter Document - 02194806
| Charter Number: | 02194806 |
|---|---|
| Cartulary Title: | Recueil des Chartes de l'Abbaye de Cluny |
| Charter Language: | Latin |
| Charter Origin: | Papal |
| Charter Type(s): | Mandate |
| Date: | 1244 |
| Date type: | Internal, Calendar, Papal |
| Resource Link(s): |
CCE: cartae cluniacenses electronicae |
Charter:
Ad audientiam nostram dilectorum filiorum [] abbatis et conventus Cluniacensis querela gravis et stupenda pervenit quod quidam archiepiscopi episcopi archidiaconi et alii ecclesiarum prelati ac eorum officiales in ipsos et monachos sui ordinis ac ecclesias cellas maneria prioratus et grangias eorumdem et in familias ac servientes ipsorum necnon in locantes eis opera sua molentes in molendinis coquentes in furnis eorum contrahentes emendo vel vendendo cum ipsis audientes missas vel horas ipsorum decimas oblationes et redditus eorum ipsis reddentes seu alias communicantes eisdem excommunicationis et interdicti sententias ferre contra indulta Sedis Apostolice auctoritate propria ne dicamus potius temeritate presumunt bona eorum capiunt et capi ac arrestiri seu sasiri per homines suos faciunt violenter quin etiam cum vacare contingit ecclesias in quibus jus obtinent patronatus difficultates ingerunt et presentatos ab eis in dictas ecclesias recipere indebite contradicunt de malefactoribus suis et injuriantibus eis nolunt exhibere justie complementum Compellunt etiam ipsos ad provisionem conversorum de judaismo et aliorum clericorum vel laicorum per litteras apostolicas licet de ordine Cluniacensi nulla fiat mentio in eisdem priores quoque ac monachos ejusdem ordinis cogunt ad obedientiam eis canonicam faciendam concessiones etiam ecclesiarum possessionem novalium et aliorum que predecessores eorum et principes ac milites et alii boni viri sibi et eorum ordini pia liberalitate ac provida concesserunt contra justitiam revocare ac bona ipsorum auferre propria temeritate conantur mandamus quatinus inquisita super premissis diligentius veritate sententias si quas inveneris sic prolatas sine qualibet difficultate relaxans illos quos eas tulisse constiterit ad satisfactionem et ut ab ipsorum super hiis indebita molestatione quiescant compellas Presentibus post triennium minime valituris Dat Laterani iiii kalendas februarii anno primo