Charter Document - 02194796
| Charter Number: | 02194796 |
|---|---|
| Cartulary Title: | Recueil des Chartes de l'Abbaye de Cluny |
| Charter Language: | Latin |
| Charter Origin: | Religious |
| Charter Type(s): | Grant |
| Date: | 1243 |
| Date type: | Internal, A.D. |
| Resource Link(s): |
CCE: cartae cluniacenses electronicae |
Charter:
Nos Seguinus miseratione divina Matisconensis ecclesie minister humilis universis presentes litteras inspecturis rei geste noticiam cum salute Universitati vestre notum facimus quod Raynaldus Discalciatus dominus Buxerie in nostra presentia constitutus pro remedio anime sue et parentum suorum donavit et in puram et perpetuam elemosinam concessit et quitavit Deo et ecclesie Cluniacensi quicquid juris seu dominii habebat vel habere debebat seu aliquo modo reclamare poterat in villa Sancti Poncii et in ea que vocatur Mons Francie in terris hominibus et rebus aliis quibuscumque ad ecclesiam Cluniacensem pertinentibus nichil omnino juris in dictis villis terris hominibus seu rebus aliis sibi retinens preterquam avenam gallinas et panes unius denarii que de garda in predictis villis et hominibus consuevit et dignoscitur recipere et habere Que videlicet avenam gallinas et panes in nostra presentia ab ecclesia Cluniacensi accepit in feodum et de ipsis fecit homagium Cluniacensi ecclesie et idem tenetur abbati facere ad ejusdem [abbatis] requisitionem et proinde habuit et recepit idem Raynaldus viginti et quinque libras Cluniacensis monete prout in nostra presentia publice recognovit Insuper res omnes premissas videlicet donationem eidem ecclesie factam et res alias quas ab eadem ecclesia accepit in feodum prefatis abbati et ecclesie Cluniacensi bona fide contra omnes garantire promisit Nos etiam ad instanciam predicti Raynaldi qui se et sua jurisdictioni nostre spontanea voluntate subjecit in hac parte prefatis abbati et ecclesie Cluniacensi bona fide promisimus quod si idem Raynaldus vel aliquis alius nomine suo contra premissa vel eorum aliqua venire presumeret nos in ipsum excommunicationis sententiam proferremus nec relaxaremus eandem quousque de illatis injuriis cum ipso dampno et interesse predictis abbati et ecclesie esset plenarie satisfactum Predictus vero abbas gardam comitis Cabilonensis vel alterius cujuscunque tenetur a predicta villa Montis Francie amovere In cujus rei testimonium confirmationem atque perpetuam stabilitatem presentes litteras ad instantiam et preces memorati Raynaldi domini Buxerie sigilli nostri munimine fecimus roborari Actum anno Domini MCC quadragesimo tercio mense aprili