Charter Document - 02194782
| Charter Number: | 02194782 |
|---|---|
| Cartulary Title: | Recueil des Chartes de l'Abbaye de Cluny |
| Charter Language: | Latin |
| Charter Origin: | Religious |
| Charter Type(s): | Petition |
| Date: | 1240 |
| Date type: | Assigned |
| Resource Link(s): |
CCE: cartae cluniacenses electronicae |
Charter:
Reverendo patri in Christo H[ugoni] Dei gratia abbati Cluniacensi frater G minister humilis ecclesie Sancti Salvatoris de Bermundens et ejusdem loci conventus salutem et cum summa reverencia debite subjectionis obedientiam Cum domus nostra de Bermundens de qua trium annorum decimas exigitis tot ruinarum sterilitatum debitorum et aliorum incommodorum sit exposita periculis ita quod vix sibi possit sufficere quod vestram non credimus latere prudentiam sanctitatis vestre pedibus provoluti flexis genibus fusis lacrimis vobis humiliter supplicamus quatenus indigentiis nostris paterno affectu compatiendo nuntium nostrum sollempnem ad capitulum generale expectare velitis qui oppressionem domus nostre vobis plenius poterit explicare Et omni qua possumus devocione paternitatem vestram de qua non modicam reportamus fidutiam suppliciter exoramus quatinus erga nos misericordie vestre abundantiam sic ostendatis ne nos qui in conspectu omnium habitamus et spectaculum sumus regi et regno paupertatis stimulo penitus consumamur Promittimus autem sanctitati vestre quod licet non sint mendicantium suffragia copiosa tamen ultra quam vires nostre suppetant vobis subveniemus subtrahentes nobismet ipsis in parte que victui nostro sunt necessaria Valeat sanctitas vestra semper in Domino