Charter Document - 02194778
| Charter Number: | 02194778 |
|---|---|
| Cartulary Title: | Recueil des Chartes de l'Abbaye de Cluny |
| Charter Language: | Latin |
| Charter Origin: | Religious |
| Charter Type(s): | Complaint |
| Date: | 1240 |
| Date type: | Assigned |
| Resource Link(s): |
CCE: cartae cluniacenses electronicae |
Charter:
Venerabilibus viris et religiosis O priori Cluniacensi et ejusdem loci conventui frater P humilis prior Volte et ejusdem loci conventus salutem et tam debitam quam devotam in omnibus hobedientiam Religioni vestre dignum duximus intimandum quod cum juxta statuta generalis capituli Cluniacensis diligenter et modo debito monuissemus in privato et in publico J de Lorsac monachum nostrum quod proprium suum nobis restitueret et cum ad debitam ammonitionem nostram hoc facere nollet juxta diffinitorum Cluniacensium mandatum ipsum excommunicatum denuntiassemus ipse ad audientiam domini abbatis assignans diem in quindena Omnium Sanctorum nescimus quo ductus spiritu appellavit et claustrum nostrum in tanto murmure posuit quod in obprobrium Dei et Cluniacensis ecclesie vertebatur Quod cum sustinere co[m]mode non possemus in quodam prioratu nostro ipsi sufficienter victum assignavimus et vestitum que ipse incontinenti distraxit et vadit vagabundus per orbem in obprobrium Dei et nostrum et ecclesie universe Et ante omnia ista duas domos nostras quas ei commendaveramus adeo distraxerat quod nullus monachus ibi residentiam potest facere Hec et multa alia mala nobis fecit que per dilectum fratrem nostrum J latorem presentium quem ob hoc specialiter vobis mittimus scire poteritis supplicantes vobis quod super dicto negocio taliter ordinetis ut Deo et vobis et Cluniacensi ecclesie cedat ad gloriam et honorem