Charter Document - 02194775
| Charter Number: | 02194775 |
|---|---|
| Cartulary Title: | Recueil des Chartes de l'Abbaye de Cluny |
| Charter Language: | Latin |
| Charter Origin: | Religious |
| Charter Type(s): | Complaint |
| Date: | 1240 |
| Date type: | Assigned |
| Resource Link(s): |
CCE: cartae cluniacenses electronicae |
Charter:
Sanctissimis patribus ac dominis H[ugoni] Dei gratia venerabili abbati Cluniacensi et ipsius ecclesie sacro conventui frater P humilis abbas Monasterii Novi et conventus totius dilectionis et reverencie famulatum Illi gratis et amicabiliter merentur suscipi qui ad materne consolationis subsidium avidius festinare laborant et petitiones ipsorum si a rationis tramite non discordent effectui debent celeriter mancipari Cum igitur ecclesia nostra tamquam nobile membrum corpori Cluniacensi sit actenus inseparabiliter conjunctum et unitum et singulare post Deum ad vos habeamus refugium in necessitatibus nostris dubitamus nullatenus exaudiri Sciatis itaque quod episcopus Pictavensis occasione cujusdam professionis quam a me abbate Monasterii Novi in promotione nostra sibi factam fuisse proponit multa dampna nobis inferre machinatur que si a vobis fuerint subtilius indagata non solum ecclesie nostre perpetuis temporibus perniciosum periculum sed etiam jurisdictionis vestre in ecclesia nostra prejudicium generare videntur Illam etenim omnimodam dignitatem vestram quam in abbatia nostra habetis sibi episcopus appetit vendicare Nullatenus enim monachos nostros ad sacros ordines promoveret nisi ei professionem facerent et ei obedienciam se fide promisserint observare Preterea juxta libitum suum pro quolibet forefacto fratres nostros vel plures vel omnes interdicto subicit vel excommunicationi Insuper annualem procurationem in corpore abbatie sibi postulat exiberi Verum quia ex tenore privilegiorum Romanorum pontificum monasterium nostrum nulli alii nisi abbati Cluniacensi aliqua debet occasione teneri subjectum et monachos Cluniacenses ubilibet habitantes nullus episcopus vel legatus nisi ad hoc missus fuerit excommunicare debet hec omnia in prejudicium vestrum esse facta merito probantur Et quia non possumus duobus dominis servire vestre sanctitati domine pater attencius supplicamus quatinus ad ecclesiam nostram et vestram [descendere dignemini] ut cum presentes fueritis ita Deo volente juxta consilium vestrum pariter et nostrum ecclesie nostre provideatis ut dignitatem vestram et jurisdictionem integram retineatis et inmunem et nos in posterum ab hiis exactionibus remaneamus inmunes Sollempnes nuncios nostros quos ad vos dirigimus in hac petitione nostra exaudiatis et eis tamquam nobis in omnibus indubitanter credatis Valete