Charter Document - 02194774
| Charter Number: | 02194774 |
|---|---|
| Cartulary Title: | Recueil des Chartes de l'Abbaye de Cluny |
| Charter Language: | Latin |
| Charter Origin: | Religious |
| Charter Type(s): | Apology |
| Date: | 1240 |
| Date type: | Assigned |
| Resource Link(s): |
CCE: cartae cluniacenses electronicae |
Charter:
Venerabilibus in Christo patribus priori Cluniacensi ceterisque sociis ejus in ordine sanctoque ejusdem loci conventui frater H humilis prior Paterniaci salutem et debitam obedientiam cum salute Paternitati vestre dignum duxi declarare quod cum ego in prima ebdomada Adventus Domini venissem in Alemania domum nostram quam habemus in Columbarum visitaturus ego sperabam ad vos reverti cicius quam non feci quia ipsam domum inveni tantis debitis oppressam et omnibus bonis temporalibus desolatam quod ibi Deo servientes non habebant unde possent substentari Insuper libri et calices [a] debitoribus tenebantur et omnes domus ruinam penitus minabantur Unde cum nullum monacum vel aliam personam possem invenire per quam dicta domus posset restaurari tandem prudentum hominum usus consilio volui de reditibus dicte domus ad sex annos obligare ut per hoc tota domus posset de cetero relevari Contigit quod dominus rex Allemanie advocatis suis precepit sub fidelitate qua tenentur eidem quod omnia bona dicte domus tam mobilia quam inmobilia regia potestate confiscarent et in manibus suis retinerent Unde pre nimio dolore in memet ipso anxiatus quid facerem penitus ignorabam quia respiciens eram ad auxilium hominum et non erat Tamen confidens in Domino qui non derelinquit sperantem in se dicens cum propheta Deus ne elongeris a me Deus meus in auxilium meum respice iter in Passione Domini ad curiam regis arripui nec eum inveni Iterum secunda feria post Pascha adii et eum minime potui invenire Reversus totam familiam meam egrotantem ad mortem inveni et adhuc in grabatis gravi infirmitate detinetur Ego vero nichilominus sperans in Domino iterum tercio reversus ad curiam feria quarta ante dominicam qua cantatur Misericordia Domini per Dei gratiam misericordiam suam consecutus et omnia bona dicte ecclesie recuperavi Cum igitur mihi nichil penitus fecisse videretur quousque de statu domus et de debitis disposuissem quod nisi fieret ecclesia penitus destrue[re]tur et esset novissimus error pejor priore inde est quod paternitati vestre in tot et tantis tribulationibus positus flexis genibus fusis lacrimis dignum duxi supplicandum quatinus affectu pietatis in hac parte mihi compatientes et quod capitulo generali interesse non possum pacienter subportantes absentiam meam apud dominum abbatem et in ipso sanctissimo capitulo excusatam habeatis Ego tamen per Dei gratiam quam cicius potero expediri et familia mea convaluerit vita comite ad vos veniam domino abbati et vobis tamquam bonus filius in omnibus et per omnia devotissime obediturus Datum aput Columbarum IIII idus aprilis