Charter Document - 02194768
| Charter Number: | 02194768 |
|---|---|
| Cartulary Title: | Recueil des Chartes de l'Abbaye de Cluny |
| Charter Language: | Latin |
| Charter Origin: | Religious |
| Charter Type(s): | Agreement |
| Date: | 1240 |
| Date type: | Internal, A.D. |
| Resource Link(s): |
Reference Document for this Embedded Document CCE: cartae cluniacenses electronicae |
Charter:
Universis presentes litteras inspecturis Robertus miseratione divina Belvacensis episcopus salutem in Domino Noverit universitas vestra quod cum venerabiles et religiosi viri abbas et conventus Sancti Johannis Angeliacensis in Pictavia prioratum sive domum de Buriaco in qua manebant duo monachi sitam in diocesi Belvacensi et sic jure communi et lege diocesiana ut dicebatur episcopo Belvacensi in omnibus spiritualibus subjectam cum omnibus pertinenciis dedissent et concessissent ecclesie Cluniacensi perpetuo possidendam orta questione inter nos et antecessores nostros ex una parte et ecclesiam Cluniacensem ex altera super hoc quod dicebant abbas et fratres ipsius ecclesie se et sua ubicumque essent ab omnimoda jureditione episcopali exempta tandem habito bonorum et prudentum virorum consilio utilitate ecclesie nostre Belvacensis pensata cum abbate et dicta ecclesia Cluniacensi composuimus in hunc modum Scilicet quod amotis inde monachis abbas et conventus predicti dictam domum sive prioratum cum omnibus pertinenciis juribus et possessionibus suis et rebus aliis ad dictam domum pertinentibus nobis et successoribus nostris dederunt et concesserunt imperpetuum possidendam ita quod nos et successores nostri singulis annis abbati et conventui Cluniacensi antedictis vel eorum certo nuncio tenemur solvere pro dicta domo et pertinenciis suis infra octabas Sancti Martini hyemalis septuaginta libras Parisienses apud Sanctum Martinum de Campis Parisius Et si forte deficeremus in solutione predicta pecunie loco et termino predictis facienda pro defectu cujuslibet diei solutionis non facte decem solidos Parisienses nomine pene cum dampnis et expensis factis occasione predicte solutionis non facte ad juramentum unius monachi ad hoc destinati solvere teneremur Dicta vero pecunia in usus et utilitatem ecclesie et mense Cluniacensis convertetur et in alios usus converti non poterit nec expendi Duobus autem presbiteris in dicto prioratu sive domo servicio divino perpetuo deputandis tenemur competenter necessaria providere Abbas enim Cluniacensis predictus nolens quod in dicta domo divinum officium deperiret decem libras Parisienses quas debebamus ei et ecclesie Cluniacensi annuatim solvere ultra summam pecunie superius nominatam nobis remisit pro provisione hujusmodi facienda Hec autem omnia et singula nos observaturos bona fide promisimus et per stipulationem nos et successores nostros et ecclesiam Belvacensem ad supradicta omnia perpetuo obligamus abbate Cluniacensi pro se et successoribus suis et ecclesia Cluniacensi obligationem hujusmodi recipiente et etiam stipulante Volumus siquidem et ad hoc spontanei nos adstringimus quod si nos vel successores nostri contra supradicta vel eorum aliqua aliquo tempore [quod absit] venerimus possimus conveniri coram judicibus delegatis propinquis seu remotis ubicumque dicti abbas et successores sui voluerint non obstante constitutione de duabus dietis edita in concilio generali Renuntiantes expresse pro nobis et successoribus nostris et ecclesia Belvacensi spontanei et scientes tam dicte constitutioni quam omni juris auxilio canonici vel civilis scripti vel non scripti promulgati vel promulgandi et omni statuto facto et faciendo omni etiam privilegio impetrato vel impetrando quod nobis posset competere ad supradicta vel eorum aliqua non attendenda vel etiam retractanda In cujus rei testimonium dictis abbati et conventui Cluniacensi tradidimus presentes litteras sigilli nostri munimine roboratas Actum anno Domini M ducentesimo quadragesimo mense augusto