Charter Document - 02194746

Reverentissimo patri in Christo ac domino amantissimo H[ugoni] Dei gratia abbati Cluniacensi devoti filii subprior et conventus Sancti Salvatoris de Bermundens salutem et tam debitam quam devotam cum summa devotione obedientiam Memores quod domino Rad priori de Alneto nuntio vestro in Anglia promisimus quod infra instans capitulum generale ad paternitatem vestram nuntium nostrum sollempnem transmitteremus beneplacitum vestrum auditurum et vobiscum prout possibilitati nostre suppetit super petitione decime triennii compositurum nos autem venerabilem patrem et priorem nostrum latorem presentium excellentie vestre destinamus filiali devotione et humilitate qua decet paternitatem vestram exorantes quatenus benignitas vestra taliter se erga nos habeat in presenti ne nos [quod absit] perpetue subdamur paupertati Non enim vestram lateret prudentiam quantis ruinarum debitorum et aliorum incommodorum domus nostra sit exposita periculis ita quod vix aut nunquam adiciet ut de tanta inopia resurgat Preterea graviter de novo oneratur domini regis taillagiis exactionibus domini legati hospitum superventibus quod sine maximo domus nostre scandalo et populi terre tumultu aliquatenus omittere possemus maxime cum domus nostra regi et regno statuatur spectaculum Illud preterea sanctitati vestre suggerimus si domino regi innotuerit de cujus dominicatura fundati sumus quod occasione istius decime conventus nostri numerus minuatur vel hospitalitas consueta aliquatenus subtrahatur rancorem ipsius et indignationem inestimabiliter incurremus Ceterum episcopi Londoniensis videlicet Roffensis Lincolniensis Bathoniensis archidiaconus et officialis Wintoniensis in quorum diocesibus decimas ecclesias vel alias possessiones possidemus nobis verbis probrosis insultant quotiens in eorum presentia pro quibuscumque domus nostre negotiis comparemus dicentes publice perditioni traditum nec elemosinam esse set peccatum quicquid beneficii nobis a quibuscunque fuerit collatum Quod vobis prefatus prior noster lator presentium plenius poterit explicare Vestre igitur benivolentie de qua summam reportamus fiduciam pedibus vestris provoluti flexis genibus fusis lacrimis humiliter supplicamus quatinus filiorum vestrorum necessitatibus paterno compatientes affectu misericordie vestre habundantiam sic ostendatis ut caritatis vestre et familiaritatis antique integritas hac vice erga nos evidenter et efficaciter propaletur scituri quod grave nobis videretur et perniciosum si in diebus nostris aliqua obedientie vel indevotionis notaremur infamia cum predecessores nostri semper extiterint obedientes Quod nequaquam continget nisi oneris impositi immoderata gravitas nos turpiter succumbere compellat Valeat et vigeat paternitas vestra per tempora diuturna Actum anno Domini MCCXXXVIII dominica in Ramis Palmarum