Charter Document - 02194705

Venerabili patri et domino Dei gratia tocius ordinis Cluniacensis abbati viro sanctissimo domnus Lanfrancus humilis prior claustralis monasterii Sancti Jacobi de Pontida Pergamensis diocesis et boni fratres in eo residentiam facientes subjectionem omnimodam tam debitam quam devotam Reverendum domnum Johannem virum providum et honestum quem nobis dominum et priorem vestra paternitas destinavit benigne vidimus et recepimus reverenter et pro honore vestre persone ac tocius ordinis omnem reverentiam quam potuimus eidem summis studiis curavimus exhibere et si moram in monasterio ipso faceret vel fecisset in eodem proposito inviolabiliter mansissemus Sed cum ab ipsius domus habitatione discedens ad vos ut intelleximus non reversurus accedat quia non sit de sua voluntate redire si de non redeundo poterit ab excellentia vestra veniam impetrare sanctitati vestre attentius et humiliter supplicamus quatenus pro Deo et misericordia si eum contingeret non redire nobis providere dignemini de pastore non permittentes ipsam ecclesiam viduatam qui sit fama et operibus laudabilis et preclarus et monasterium ac confratres tam in spiritualibus quam in corporalibus recte provideat et disponat Cumque monasterium ipsum multis et variis expensarum oneribus aggravetur tum propter fodra et exactiones immensas que nobis cotidie imponuntur specialiter etiam per apostolice sedis in Lombardia legatum et propter debita gravia imminentia tum propter guerras undique circumstantes et alia multa inconvenientia sicut vestra magnitudo cognoscit talem hic convenit et oportet pastorem habere cujus vita scientia et moribus reflorescat et cujus potentia manifesta et hiis partibus cognoscant possitque per ejus prudentiam et virtutes sibi commissum officium exercere et ipsum monasterium defendere in suis necessitatibus et tueri Et quoniam ab omni specie symonie cupimus per vestram providenciam precaveri vestre sanctitatis beneficium et auxilium in hoc specialiter et misericorditer invocamus quod huic mortali morbo et insanabili vicio resistatis ne quis per interventum precum vel injustas et illicitas expensas [quod absit] in vestro monasterio de Pontida optineat prioratum quia si illud aliquo casu [quod avertat Dominus] eveniret gravissimum induceret scandalum et ad confusionem omnimodam monasterii tam in spiritualibus quam in temporalibus sine dubio pertineret Noverit enim vestra paternitas quod hic quasi publice sonat et fertur quod super hoc in hiis partibus facta sunt et fiunt cotidie per aliquos tractamenta ut non per prudenciam et virtutes dicti monasterii prioratum sed interventu pecunie per pravitatem symoniacam habeant Et super hoc dominationem vestram duximus humiliter consulendam quod venerabilem patrem episcopum Briciensem sicut vestra dignabitur prudencia consulatis qui cum vere diligat nomen vestrum ac universum ordinem de Cluniaco et istarum partium condicionem agnoscat maxime vestri monasterii de Pontida in quo multa bona operatus est et cui multa servicia commoditates et utilitates dignoscitur contulisse paternitati vestre consulet bona fide de eo quod ad honorem Dei vestreque persone et tocius ordinis dante Domino pertinebit sicut firmiter credimus et speramus Habituri etiam super hoc sicut vestra dignabitur magnitudo consilium a reverendo viro camerario vestro in Lombardia vicario constituto qui et ipse secundum noticiam in partibus istis habet consilium rectum dabit et super eo conscienciam illesam et puram habebit si paternitati vestre placuerit quod priorem de istis partibus habeamus et de partibus vestris nobis pastorem non duxeritis transmittendum Et insuper pater sancte cum per prudentiam prefati episcopi Briciensis sit nostrum monasterium relevatum et adhuc oporteat relevari sanctitati vestre attencius supplicamus quatenus pro Deo et pietate vestra ad ipsum vestrum nuncium dirigatis ut super factis ipsius monasterii provideat diligenter nec ipsum gravet onus nostrum suis humeris sustinere nobisque more solito consulere ac juvare dignetur ut adjutorium et favorabile consilium a Deo et ipsius prudentia cognoscamus et per ipsum ab arduis et imminentibus necessitatibus in quantum fieri poterit liberemur adjungentes etiam supplicationibus nostris quod in favorem vestri monasterii de Pontida excellencie vestre videbitur adjungendum Et quia propter seditiones et guerras littere clause in hiis partibus deferri non possunt has litteras quas vestre magnitudini destinamus apertas dimisimus sigillo conventus monasterii sigillatas