Charter Document - 02194693
| Charter Number: | 02194693 |
|---|---|
| Cartulary Title: | Recueil des Chartes de l'Abbaye de Cluny |
| Charter Language: | Latin |
| Charter Origin: | Religious |
| Charter Type(s): | Petition |
| Date: | 1235 |
| Date type: | Internal, A.D. |
| Resource Link(s): |
CCE: cartae cluniacenses electronicae |
Charter:
Reverendo patri ac domino Stephano Dei gratia abbati Cluniacensi humilis conventus de Wasto obedientiam debitam cum salute Cum virum venerabilem magistrum J priorem nostrum sabbato ante festum beati Nicholai contigerit decessisse et domus nostra gravi et inopinabili debitorum pondere sit oppressa nec credimus quod ipsa sine adjutorio comitisse Bolonie ballivorumque ejus valeat sustentari cum igitur prepositus noster inter magnos et graves patrie favorabilis habeatur et Hunaudum de Staple sororium suum senescallum Bolonie qui preest omnibus ballivis pro libertate ecclesie nostre et rebus nostris omnibus observandis propitium usque nunc habuerit et amodo si eidem opus fuerit habebit qui dictus senescallus jam sub defensione domine comitisse et sua omnes res nostras et homines nostros custodiendos accipiens et promittens quod si domum nostram Willermo preposito nostro conferre volueritis possessiones nostras integras et salvas custodiret et omnia debita nostra secundum quod nobis et ecclesie nostre viderit expedire invitis omnibus creditoribus nostris adterminaret quod pro omni posse nostro pro trecentis libris Parisiensibus non procuraremus paternitatem vestram quantum cum interest paupertatis nostre requirimus humiliter implorantes quatinus intuitu Dei et precum nostrarum interventu si omnia nostra esse salva volueritis prioratum nostrum dicto preposito si vobis placet conferatis salva pensione vestra et omnibus arriragiis in proximis nundinis L[at]iniacensibus vobis omni dilatione postposita persolvendis Quia vero in medio prave nationis consistimus timemus ne dampna maxima patiamur si ingnotum notis patrie preferatis Testamur in verbo Domini quotquot sumus presbyteri quod in dispositione spiritualium pariter et temporalium nullum dicto preposito novimus utiliorem Inquiratis etiam de domno Martino harengario Cluniacensi de beneficiis a dicto preposito nobis et domui nostre fideliter impensis et quomodo negotia conventus Cluniacensis et harengario vestro procuraverit Qui bene vobis dicet si voluerit et statum domus nostre et illius beneficium quem petimus in priorem Mittimus ad vos domnum Ingelrannum socium nostrum qui statum nostrum vobis plenius intimabit et eidem tanquam nobis credatis Quid autem nobis videritis expedire oculi vestri videant et mature Actum anno Domini MCC tricesimo quinto