Charter Document - 02194656
| Charter Number: | 02194656 |
|---|---|
| Cartulary Title: | Recueil des Chartes de l'Abbaye de Cluny |
| Charter Language: | Latin |
| Charter Origin: | Religious |
| Charter Type(s): | Composition |
| Date: | 1234 |
| Date type: | Internal, A.D., Feast |
| Resource Link(s): |
CCE: cartae cluniacenses electronicae |
Charter:
Universis Christi fidelibus ad quos presentes littere pervenerint H[aimo] Dei gratia Matisconensis ecclesie minister humilis salutem in vero salutari Universitati vestre notum facimus quod cum controversia verteretur inter ecclesiam Cluniacensem ex una parte et Hugonem de Petra Campi ex altera super morte Johannis Barnesse et guerra proinde mota ac dampnis et injuriis proinde mutuo illatis tamdem de utriusque partis amicorum consilio pax et compositio intervenit in hunc modum Quod Hugo de Petra Campi ecclesie Cluniacensi in capitulo et Petro Barnesse merciam clamavit super morte dicti Johannis Barnasse patris ejusdem Petri et deduxit ac negavit quod ipsum Johannem non inquirebat persequendo sed fortuitu invenit et quod non animo interficiendi ipsum invasit vel percussit set ut ipsum caperet et hoc tanquam iratus Unde ratione emende pro anima ejusdem Johannis promisit et tenetur centum missas facere celebrare et Petrum Barnesse et suos super omnibus injuriis et dampnis ratione vel occasione guerre sibi et suis illatis quittavit libere et absolute et promisit quod deinceps Petrum Barnesse et suos in bona pace et fideli amore de se et suis tenebit habebit et pro posse suo conservabit Petrus vero Barnesse eisdem Hugoni et suis mortem patris sui condonavit et quittavit et omnem rancorem precise remittens ad pacis obsculum eundem admisit et hoc tam pro se quam pro suis de cetero esse firmum et stabile promisit Item dictus Hugo de Petra Campi super injuriis et dampnis ratione et occasione predicte guerre sibi et suis illatis pro se et suis ecclesiam Cluniacensem et suos quittavit libere et absolute Et pro emenda mortis Johannis Barnesse et dampnorum ecclesie Cluniacensi illatorum dedit concessit et quittavit ecclesie Cluniacensi quicquid possessionis quicquid juris quicquid rationis possidet habet aut possidere habere vel reclamare potest nunc temporis in villa Sancti Ypoliti infra fossata et etiam quod de vercheria sua et de clauso vinee in excisura fossatorum cadet et obveniet et quod infra fossata continebitur ecclesie Cluniacensi dedit concessit quittavit in perpetuum libere et absolute Ecclesia vero Cluniacensis omnes injurias omnia dampna et deperdita que tam ratione mortis Johannis Barnesse quam occasione guerre sustinuerat pro se et suis dicto Hugoni de Petra Campi et suis in perpetuum bona fide quittavit et remisit et Robertum de Aynai occasione guerre occisum super injuriis et dampnis que sibi intulerat quittavit et absolvit promittens quod cum sibi constiterit ipsum Robertum alias esse absolutum in capitulo Cluniacensi eundem absolvi facient et pro ipso precipient fieri orationes Hec omnia superius expressa Hugo de Petra Campi tactis sacrosanctis evangeliis juravit pro se et suis in perpetuum firmiter tenere et inviolabiliter observare Et nos ad preces et instantiam ejusdem Hugonis ad majorem rei certitudinem presentes litteras ecclesie Cluniacensi tradidimus sigilli nostri munimine roboratas Actum die martis proxima ante festum beate Marie Magdalene anno Domini MCCXXX quarto