Charter Document - 02194634
| Charter Number: | 02194634 |
|---|---|
| Cartulary Title: | Recueil des Chartes de l'Abbaye de Cluny |
| Charter Language: | Latin |
| Charter Origin: | Religious |
| Charter Type(s): | Grant |
| Date: | 1224 |
| Date type: | Internal, A.D. |
| Resource Link(s): |
CCE: cartae cluniacenses electronicae |
Charter:
Nos Guillermus miseratione divina Cabilonensis ecclesie minister humilis universis et singulis presentes litteras inspecturis significamus quod Guido dominus de Serceio Jerosolimam profecturus in nostra presentia constitutus dedit concessit et tradidit in puram et perpetuam elemosinam Deo et ecclesie beati Petri Cluniacensis et conventui ejusdem loci quicquid percipiebat vel percipere consueverat in decima vinearum de Serceio libere pacifice et perpetuo possidendum Addidit etiam quod illa tertia racemorum que sibi de dictis vineis debetur insimul decimetur et ne fraus in solutione decimarum fiat a debitoribus vinearum voluit et precepit ut decimam recipiat quandocunque voluerit antequam perveniat ad decimam asinatam Hanc vero donationem laudavit Berta uxor dicti militis et tam dictus miles quam dicta domina promiserunt dictam donationem bona fide contra quoslibet guarantire et damna si qua inde evenerint resarcire corporali super hoc prestito sacramento In cujus rei memoriam ad requisitionem dictorum militis et dicte domine ejus uxoris predicto conventui nostras tradidimus litteras in testimonium veritatis Actum anno gratie MCCXXX tercio mense julio