Charter Document - 02194615

Gregorius episcopus servus servorum Dei dilectis filiis magistro scolarum Sancti Petri [] subdiacono et magistro R Zacharie canonicis Beati Hilarii Pictavensis salutem et apostolicam benedictionem Ex parte dilectorum filiorum abbatis et conventus Cluniacensis nobis est oblata querela quod cum Monasterium Novum Pictavense et ejus membra Cluniacensis ordinis eis sint immediate subjecta et per apostolice sedis privilegia ab episcopali jurisdictione libera esse noscantur venerabilis frater noster Burdegalensis archiepiscopus in eos jurisdictionem indebitam gestiens usurpare predictum monasterium et quosdam prioratus ipsius contra justiciam aggravat procurationibus et aliis exactionibus indebitis inquietat quo etiam non contentus in abbatem ejusdem pro eo quod vocatus ab ipso noluit sicuti nec debebat provinciali concilio interesse de facto cum de jure nequiverit excommunicationis sententiam promulgavit in Cluniacensis monasterii prejudicium et gravamen Unde irritam nunciari predictam sententiam tanquam a non suo judice promulgatam et compesci ab hujusmodi eundem archiepiscopum petierunt Willelmus vero clericus ipsius archiepiscopi procurator obtentis super hoc litteris in communi audientia contradicens proposuit quod cum prefatum Monasterium Novum et prioratus ipsius in provincia Burdegalensi consistant ipse ac predecessores ejusdem exercuerunt ibidem visitando provinciam visitationis et correctionis officium et procurationes et alia jura debita perceperunt et cum memoratus abbas accedere ad ipsius provinciale concilium sicut tenetur de antiqua et approbata ipsius provincie consuetudine denegasset ipse tulit excommunicationis sententiam in eundem Quare idem petiit procurator ut predictam excommunicationis sententiam observari usque ad satisfactionem congruam mandaremus et non pateremur in premissis jurisdictioni ejusdem archiepiscopi derogari Idcircoque discretioni vestre de utriusque partis procuratorum assensu per apostolica scripta mandamus quatinus vocatis qui fuerint evocandi audiatis causam et eam si de partium voluntate processerit fine canonico terminetis facientes quod decreveritis auctoritate nostra firmiter observari Alioquin eam sufficienter instructam ad nostram presentiam remittatis prefigentes partibus terminum competentem quo per se vel procuratores idoneos nostro se conspectui representent justam auctore Domino sententiam recepture Testes autem qui fuerint nominati si se gratia odio vel timore substraxerint per censuram ecclesiasticam appellatione cessante cogatis veritati testimonium perhibere Quod si non omnes hiis exequendis potueritis interesse duo vestrum ea nichilominus exequantur Datum Spolete IIII kal junii pontificatus nostri anno sexto