Charter Document - 02194600
| Charter Number: | 02194600 |
|---|---|
| Cartulary Title: | Recueil des Chartes de l'Abbaye de Cluny |
| Charter Language: | Latin |
| Charter Origin: | Religious |
| Charter Type(s): | Request |
| Date: | 1230 - 1236 |
| Date type: | Assigned |
| Resource Link(s): |
TELMA - Chartae galliae CCE: cartae cluniacenses electronicae |
Charter:
Reverendis patribus et dominis domino Stephano abbati totique sacro conventui Cluniacensi frater L subprior totusque conventus monasterii de Pontida filii eorum humiles ac devoti usque ad mortem obedientiam promptam pariter et devotam Cum super instituendo sive preficiendo nobis priore nec nominationem nec electionem habeamus immo ipsius institutio ac destitutio electio nominatio ac omnimoda ordinatio sicut cognovimus et sincere recognoscimus ad solius vestre voluntatis arbitrium domine abbas plene ac libere noscitur pertinere unde ad vestram sicuti tenemur recurrimus paternitatem tanquam devoti obedientie filii ut nobis de priore provido discreto et honesto provideatur reverentie vestre cum devotione lacrymabili supplicantes quatinus cum jam more dispendium non mediocriter sit dampnosum desolationi nostre pio compassionis animo condolentes talem nobis priorem preficere dignemini cujus discretio sive prudentia nobis et ordini Cluniacensi proficiat ad honoris materiam et augmentum et per cujus industriam ecclesia nostra de Pontida tam in spiritualibus quam temporalibus gratum possit percipere incrementum credentes ea indubitanter que Johannes frater noster lator presentium ex parte nostra vestre intimaverit sanctitati