Charter Document - 02194578
| Charter Number: | 02194578 |
|---|---|
| Cartulary Title: | Recueil des Chartes de l'Abbaye de Cluny |
| Charter Language: | Latin |
| Charter Origin: | Religious |
| Charter Type(s): | Exhortation |
| Date: | 1228 |
| Date type: | Assigned |
| Resource Link(s): |
TELMA - Chartae galliae CCE: cartae cluniacenses electronicae |
Charter:
Reverentissimo patri nostro et domino reverendo B Dei gratia Cluniacensi abbati frater G humilis subprior Sancti Martini de Campis Parisiensis et devotus ejusdem loci conventus salutem et devotam obedientiam usque ad mortem Quanto devotius tanquam filii obedientie pie matri nostre ecclesie Cluniacensi semper obedientes extitimus et subjecti tanto magis confidimus preces nostras pias quidem et honestas effectu prosequente facilius exaudiri Sane bene novit vestra paternitas et hoc cunctis est positum in aperto quod per probatam providentiam et expertam venerabilis et karissimi domini B prioris nostri ecclesia Sancti Martini tam in spiritualibus quam in temporalibus incrementum est per Dei adjutorium multiplex assecuta et ex ejus absentia diuturna grave posset in eisdem incurrere detrimentum Cum igitur occasione prioratus de Karitate cujus curam propter tunc imminens periculum eidem commiseritis ad tempus ac ejus absentia nobis gravis extiterit et dampnosa quam plurimum et mora ejus trahere posset in posterum periculum ad se majus paternitati vestre fusis lacrymis quanta possumus affectione supplicamus humiliter et devote quatinus more pii patris devotissimis filiorum precibus inclinati dictum priorem pastorem nobis utillimum ab administratione et sollicitudine Karitatensis ecclesie relaxare velitis omnino ut tam circa nostra quam ecclesie Cluniacensis in partibus nostris negotia que fideliter consuevit et efficaciter promovere vacare possit liberius et prodesse nobis et ecclesie nostre quam pre ceteris specialius diligere tenemini gratiam hujusmodi favorabiliter impendentes ne domini et pastoris pernecessarii et fidelis ecclesia ipsa desolationem ulterius sustineat nimis gravem Et tantum inde faciatis ut propter hunc favorem nobis exhibitum ad devotionem vestram artius astringamur et apud Deum et homines habeatis gratiam ampliorem Valeat in Domino benigna paternitas vestra