Charter Document - 02194575
| Charter Number: | 02194575 |
|---|---|
| Cartulary Title: | Recueil des Chartes de l'Abbaye de Cluny |
| Charter Language: | Latin |
| Charter Origin: | Papal |
| Charter Type(s): | Mandate |
| Date: | 1228 |
| Date type: | Internal, Papal |
| Resource Link(s): |
CCE: cartae cluniacenses electronicae |
Charter:
Gregorius Episcopus servus servorum Dei dilectis filiis Abbati et Priori Resbacen et thesaurario Oyensi Meldensis et Trecensis Diecesum salutem et Apostolicam benedictionem Jam dudum nostris auribus est relatum quod quidam Prioratus ad Cluniacensem Ecclesiam immediate spectantes cum quibusdam grangiis sive cellis Monachorum usibus deputatis quibusdam tam Cluniacensis quam alterius Ordinis Abbatibus sunt concessi aliquibus ex ipsis Prioratibus et grangiis sive cellis sibi ad usus suos quoad vixerint assignatis Ex quo preter temporale dispendium cum unus Abbas vix sufficiat ad unius regimen Abbatie pro eo quod occupationum diversitas minus sufficere faciat ad diversa et sollicitudinis ipsa divisio non permittit noctis vigilias supra gregem debita diligentia custodire spiritualium imminet detrimentum divinum perit officium et regularis observantia prepeditur et quod negligendum non est salus ipsa negligitur subditorum Volentes igitur super hoc ex officio nostro salubriter providere discretioni vestre per Apostolica scripta mandamus quatinus dictos Prioratus et cellas et grangias habita expensarum et perceptorum fructuum ratione ad ipsum Monasterium auctoritate Apostolica revocetis Quos cum dilectus filius Abbas Cluniacensis duxerit ordinandos eadem auctoritate tam ejus Ordinationem quam Ordinatos ab ipso si necesse fuerit defendatis proviso ne contra hoc a detentoribus in fraudem aliquid committatur contradictores censura Ecclesiastica sublato appellationis obstaculo compescendo Non obstantibus confirmationis litteris super iis in forma communi a sede Apostolica impetratis nec obstante constitutione de duabus dietis edita in Concilio generali dum tamen qui super hoc conventi fuerint ultra quatuor dietas extra suam Diecesim non trahantur Quod si non omnes iis exequendis potueritis interesse duo vestrum ea nihilominus exequantur Datum Perusii VI Idus Decembris Pontificatus nostri anno secundo