Charter Document - 02194571
| Charter Number: | 02194571 |
|---|---|
| Cartulary Title: | Recueil des Chartes de l'Abbaye de Cluny |
| Charter Language: | Latin |
| Charter Origin: | Papal |
| Charter Type(s): | Mandate |
| Date: | 1228 |
| Date type: | Internal, Calendar, Papal |
| Resource Link(s): |
CCE: cartae cluniacenses electronicae |
Charter:
Gregorius Episcopus servus servorum Dei dilectis filiis Conventui Cluniacensi salutem et Apostolicam benedictionem Dilecti filii Abbatis Cluniacensis merita grata siquidem et accepta indicarunt de ipso ut ad majorem sollicitudinem assumi deberet in qua Deo amplius fructum afferret cui ab olim se totaliter deputavit Solent enim indicare de homine actus sui et de ipso testimonium perhibere Sane vos delectati nuper in odore religionis et fame Abbatis predicti tunc Archidiaconi Cluniacensis experti quoque charitatis sue zelum ac donum discretionis et scientie quo vigere constat eumdem vacante Monasterio vestro cujus regimen predecessor ipsius spontaneus resignavit in personam Abbatis ejusdem pari voto et unanimi voluntate universi et singuli convenistis quibusdam ex vobis ad nostram presentiam destinatis suppliciter et devote petentibus ut confirmaremus electionem factam de ipso et eum preficeremus eidem Monasterio in Pastorem Nos autem tanto id amplius acceptantes quanto magis confidimus de persona sua Monasterio ipsi utiliter esse provisum confirmata electione ipsius benedictionis munus ei per nos ipsos curavimus impertiri Cum autem sub regimine Abbatis ejusdem obtinentis sue merito probitatis gratiam nostram et fratrum nostrorum favorem Monasterium ipsum et totus ordo Cluniacensis grata sperentur suscipere incrementa vosque debeatis ex eo quod eum habere meruistis in patrem merito exultare nos ipsum cum gratie nostre plenitudine remittentes discretioni vestre per Apostolica scripta mandamus quatenus eumdem debito suscipientes honore sibi tanquam Patri et Pastori animarum vestrarum plene et humiliter intendatis et exhibeatis obedientiam et reverentiam debitam et devotam Alioquin sententiam quam ipse rite tulerit in rebelles ratam habebimus et faciemus auctore Deo usque ad satisfactionem condignam inviolabiliter observari Datum Perusii XII Kalendas Novembris Pontificatus nostri anno secundo