Charter Document - 02194569
| Charter Number: | 02194569 |
|---|---|
| Cartulary Title: | Recueil des Chartes de l'Abbaye de Cluny |
| Charter Language: | Latin |
| Charter Origin: | Religious |
| Charter Type(s): | Exhortation |
| Date: | 1228 |
| Date type: | Internal, A.D., Calendar |
| Resource Link(s): |
CCE: cartae cluniacenses electronicae |
Charter:
Reverendis patribus ac dominis domno R abbati totique sacro conventui Cluniacensi fratres H subprior totusque conventus monasterii de Pontida filii eorum humiles ac devoti salutem et usque ad mortem obedientiam promptam pariter et devotam Prioris nuper regimine miserabiliter destituti debitum vestre provisionis officium super substitutione alterius sicut et tenebamur tanquam devotionis et obedientie filii devote duximus ac humiliter implorandum Cum enim super instituendo sive preficiendo nobis priore nec electionem nec nominationem nec omnino tractatum aliquem habeamus nec nobis super hoc vel etiam super hiis jus aliquod vendicemus cum ipsius institutio ac destitutio electio ac nominatio ac omnimoda ordinatio sicut plene cognovimus et sincere recognoscimus ad solius vestre voluntatis arbitrium domine abba plene noscatur ac libere sine obstaculo quolibet pertinere tanto propensiori cura vobis inminet de persona nobis ydonea providere quanto probitatis ipsius merita secundum quod scriptum est Gloria patris est filius sapiens eminentius attollunt vestri nominis titulos et honoris quantoque ex adverso simplicitatis ipsius aut inbecillitatis insolentia serenitati vestre nubilum et monasterio vestro de Pontida non leve potest inducere detrimentum Sane si quid simplicitate qualibet aut quacunque arte vel quocunque casu aut ingenio a nobis vel a quoquam extitit hactenus attemptatum per quod plenitudini juris vestri super premissis possit in aliquo derogari vel nobis super eisdem jus aliquod seu etiam possessorium acquiri nos in presentia nuntiorum vestrorum domni Bartholomei de ordine Cluniacensi et H prioris Sancti Mayoli Papiensis in capitulo de Pontida omni juri hujusmodi sponte renuntiavimus et expresse Quam renuntiationem per presentes litteras iterantes paternitati vestre cum devotione lacrimabili supplicamus quatinus cum jam more dispendium non mediocriter sit dampnosum desolationi nostre pio compassionis animo condolentes talem nobis priorem preficere dignemini cujus discretio sive prudentia vobis et ordini Cluniacensi proficiat ad honoris materiam et augmentum et per cujus industriam monasterium de Pontida tam in temporalibus quam in spiritualibus gratum percipere possit et debeat incrementum Actum est hoc et recitatum in pleno capitulo de Pontida presente conventu ipsius loci anno Domini MCC vicesimo octavo tertio nonas septembris