Charter Document - 02194567
| Charter Number: | 02194567 |
|---|---|
| Cartulary Title: | Recueil des Chartes de l'Abbaye de Cluny |
| Charter Language: | Latin |
| Charter Origin: | Papal |
| Charter Type(s): | Mandate |
| Date: | 1228 |
| Date type: | Internal, Calendar, Papal |
| Resource Link(s): |
CCE: cartae cluniacenses electronicae |
Charter:
Gregorius Episcopus servus servorum Dei venerabili fratri Bituricensi Archiepiscopo salutem et Apostolicam benedictionem Significantibus dilectis filiis Abbate ac Conventu Cluniacensi intelleximus quod cum bone memorie Honorius Papa predecessor noster Archiepiscopis et Episcopis in quorum Diecesibus Monasteria et Celle ordinis sui consistunt per suas litteras prohibuerit ne de cetero in eos qui molerent in molendinis et coquerent in furnis fratrum suorum seu alias communicarent eisdem excommunicationis aut interdicti sententias propter hoc presumerent promulgare tu contra prohibitionem Sedis Apostolice veniens quod credere vix possumus in illos qui communicarunt eisdem fratribus in predictis hujusmodi sententias protulisti Cum autem si predicta veritate nitantur non tam deliquisse in illos quam contradixisse auctoritati Sedis Apostolice videaris fraternitati tue per Apostolica scripta mandamus quatenus sententias taliter a te latas sine qualibet difficultate relaxes alioquin dilectis filiis Decano Officiali et L de Germiniaco Canonico Nivernensibus nostris damus litteris in mandatis ut ipsi easdem sententias sine more dispendio veritate cognita studeant relaxare Datum Perusii V Kalendas Augusti Pontificatus nostri anno secundo