Charter Document - 02194565
| Charter Number: | 02194565 |
|---|---|
| Cartulary Title: | Recueil des Chartes de l'Abbaye de Cluny |
| Charter Language: | Latin |
| Charter Origin: | Papal |
| Charter Type(s): | Mandate |
| Date: | 1228 |
| Date type: | Internal, Calendar, Papal |
| Resource Link(s): |
CCE: cartae cluniacenses electronicae |
Charter:
Gregorius Episcopus servus servorum Dei dilectis filiis Abbati et Conventui Cluniacensi salutem et Apostolicam benedictionem Quo abundantius regularis ordinis professores percipiunt in temporalibus divine gratiam largitatis eo fortius filii seculi eorum profectibus invidentes ipsos suis satagunt molestiis sub pretextu justitie fatigare Ex vestra sane insinuatione accepimus quod cum Dioeceses in partibus vestris adeo sint diffuse quod quedam earum per tres dietas et amplius protenduntur nonnulli clerici et laici vos gravare volentes contra vos et fratres vestros in eisdem Dioecesibus constitutos judicibus licet non ultra duas dietas extra Dioecesim a vestris tamen domibus longe ultra distantibus causas contra vos obtinent delegari per quas nimium gravari expensis et laboribus vos contingit Unde provideri super hoc vobis et fratribus vestris per nostram sollicitudinem postulastis Quia vero eo magis vestris occurrimus gravaminibus quo specialius ad Sedem Apostolicam pertinetis auctoritate vobis presentium indulgemus ut vos et fratres vestri ultra duas dietas a vestro Monasterio vel domibus vestris immediate tamen ad Monasterium vestrum spectantibus trahi ad judicium per commissiones Apostolicas non possitis nisi de indulgentia hujusmodi expressam forte fecerint mentionem Nulli ergo [] Datum Perusii V kal julii pontificatus nostri anno secundo