Charter Document - 02194554

In nomine Domini Amen Quoniam melius et magis memorie commendantur que sub testimonio litterarum rediguntur iccirco notum sit presentibus et futuris quod cum orta fuisset controversia inter Bracarensem et Cluniacensem ecclesias super ecclesia de Viminario cum pertinentiis suis asserente archiepiscopo Bracarensi illam pertinere ad Bracarensem ecclesiam Cluniacense vero monasterio allegante illam pertinere ad se ex donatione regum Portugalie quam donationem Bracharensis archiepiscopus dicebat non valere etiamsi facta fuisset utpote sine consensu Braccarensis ecclesie post multas commissiones a summis pontificibus delegatis super hoc judicibus destinatas et executiones per eosdem judices pro Bracarensi ecclesia factas et multas et varias altercationes et allegationes hinc inde propositas tandem inter dominum Stephanum archiepiscopum et capitulum Bracharense ex una parte et Thomam sacristam et Martinum visitatores in Ispania monachos Cluniacenses et Johannem camerarium Villefrance et Stephanum priorem de Ratis nomine abbatis et conventus Cluniacensis ex altera talis compositio intercessit videlicet quod archiepiscopus habeat ibi semel in anno procurationem sibi ratione visitationis debitam sufficientem et honestam et quinque morabatinos pro censu annuatim in festo Sancti Johannis Baptiste et archidiaconus Bracharensis qui pro tempore fuerit habeat similiter procurationem suam sicut habet in aliis ecclesiis parrochialibus archidiaconatus sui item tertiam partem mortuariarium de mobilibus tantum et vota a rusticis consueta Item abbas Cluniacensis vel camerarius de Villafranca vel visitator qui ex parte Cluniacensis monasterii venerit ad partes illas visitandas ponat priorem in Viminario perpetuum qui non removeatur nisi culpa exigente Qui si male administraverit vel male vixerit archiepiscopus debet denuntiare loco in ecclesia de Viminario et capellanus qui ibi fuerit perpetuus vel clerici ejusdem loci significabunt camerario Villefrance ut ipse camerarius infra tempus competens prefixum ab archiepiscopo ponat ibi alium priorem et istum revocet ad se Prior vero de Viminario presentabit capellanum idoneum et perpetuum domino archiepiscopo confirmandum qui de spiritualibus domino archiepiscopo respondebit Qui si male vixerit vel negligenter egerit archiepiscopus exigente justitia illum destituat et alium ad presentationem prioris instituat loco ejus Et archiepiscopus habebit correctionem in clericos ipsius loci qui deliquerint contra sui ordinis instituta Item prior qui ibi pro tempore fuerit debet venire ad concilium domini archiepiscopi generale et ibi ejus recipere monita salubria quantum ad omnia que continentur in hac carta Et similiter capellanus et clerici cum eo debent venire ad ipsam synodum mon[i]ta salubria recepturi Et archiepiscopus non debet ipsum priorem vel ejus monachos excommunicare vel suspendere Si vero prior qui ibi fuerit supradicta noluerit adimplere archiepiscopus subponat ipsam ecclesiam de Viminario interdicto et ejus interdictum tam prior quam monachi quam etiam clerici observabunt Ad hoc autem totum adimplendum et specialiter ad remotionem prioris si res exigerit prout superius est dictum predicti monachi nomine abbatis et conventus Cluniacensis obligarunt sex casalia que sunt in villa que vocatur Tralacste in cauto monasterii videlicet totam ipsam villam quia tot tantum sunt ibi casalia De quibus casalibus quamdiu prior de Viminario permanserit in contumacia non adimplendo aliquid de supradictis articulis archiepiscopus recipiat fructus quos non restituet monasterio de Viminario etiam post satisfactionem factam post satisfactione facta restituet tantum ipsa casalia monasterio supradicto Preterea sciendum est quod quicquid hactenus actum fuit sive per violentiam sive per forciam sive alio quocumque modo tam ex parte domini archiepiscopi quam ex parte Cluniacensis monasterii totum dimissum est et renunciatum per hanc compositionem factam de beneplacito utriusque partis et renunciatum est ab utraque parte omnibus instrumentis habitis et habendis et cassata sunt omnia instrumenta que aliquatenus possent coram domino papa vel aliis judicibus allegari Et dominus archiepiscopus sub predicto tenore concedit de novo monasterium de Viminario salvis omnibus juribus supradictis Braccarensis ecclesie monasterio Cluniacensi in perpetuum possidendum Debet [etiam] ipse Braccarensis archiepiscopus qui pro tempore fuerit commendatos habere manutenere et deffendere priorem de Viminario et ipsum locum et in quibuscunque potuerit adjuvare Acta sunt hec apud Bracaram sub era MCCLX V mense novembri Qui presentes fuerunt[] decanus magister S cantor Jo Pelagii magister M magister scolarum [N] archidiaconus M Martini thesaurarius M Menendi Laurencius Gonsalvi Egeas Fafilus Dominicus Petri Aldefonsus Orlorii Petrus Pelagii Johannes Petri magister Johannes et Stephanus Petri canonici Bracarenses [N] judex Dominicus Suerii Gunsalvus Menendi Vincentius Suerii et Dominicus Petri cives Bracarenses Johannes Pelagii clericus et Johannes monachus capellanus de Viminario et multi alii clerici et laici