Charter Document - 02194550

Sanctissimo patri ac domino R[olando] divina providentia Cluniacensi abbati H humilis prior Moisiacensis monasterii ac ejusdem loci totus conventus debitam cum subjectione obedientiam Ex quo nostrum monasterium suos humeros Cluniacensi ecclesie supposuit quanta qualisve fraternitatis ac familiaritatis dilectio nos vobis conjunxerit dilectionem vestram nequaquam credimus ignorare Et ideo dilectos fratres nostros Ad priorem beate Marie Deaurate Tolose ac A de Aragone quem dominus abbas noster R[aymundus] condam bone memorie dum viveret domus nostre procuratorem constituit necnon R jam dicti domini abbatis capellanum vobis mittimus adversitates et angustias quas nostra ecclesia passa est et adhuc patitur ac etiam quod eidem super hiis profuturum esse cognoscimus declarando Noverit itaque vestra paternitas quod pastor noster R condam bone memorie de vite medio est sublatus et nostra ecclesia in mari magno et fluctuoso pleno raptoribus posita incessanter ab inimicis justitie devastatur ac sui pauperes redditus quos ab antiquis temporibus possidebat ita ad nichilum sunt redacti quod suis servitoribus dum divinum officium ibidem celebrabitur vix poterit providere Domino etiam abbati nostro dum viveret nostri redditus sufficere non valebant Et sicut jam dictus abbas per sex annos transactos et amplius in sede propria moram facere non fuit ausus tum propter cardinalem tum maxime propter comitem Tolosanum Ita predictis de causis credimus quod abbas succedens in nostro monasterio ad presens moram facere non audebit Et quia tot et tantis malis nostra ecclesia circonvallatur que tali pastore indiget qui moderanter expensas faciat et se ipsum ad presens propriis expensis regere et nobis consulere presentialiter possit ac notus in patria benivolentiam nobilium ac omnium terre dominorum captare sciat ac nos et honorem nostri et nostri utilitatem noverit gubernare Cum igitur talem qualem prediximus penes nos invenerimus dominum videlicet R abbatem Lesatensem boni testimonii virum ipsum vobis dignum duximus pretendendum Hic etenim maxima dona virtutum percepit Est enim studio castitatis mundus abstinentie robore validus ad sufficientiam litteratus ad omnem tolerantiam fortis ad sustinendam injuriam mitis ad faciendam misericordiam facilis ac omnis patria ipsum excellentiori prelatura judicat esse dignum Insuper ipse sese et nos qui hucusque exules et vagantes pauperrimam vitam duximus in abbatia sua sustantare poterit quousque in nostram ecclesiam licite redeamus Qua de causa benignitatem vestram flexis genibus exoramus quatinus jam dictum dominum R abbatem Lesatensem vestri ac nostri monasterii monachum nobis in pastorem concedere dignemini Hunc enim a vobis summopere petimus ac toto cordis desiderio affectamus Et quia dominus cardinalis dum in sua legatione ecclesias vacantes repperit electiones fieri sine suo consensu et consilio prohibet adhuc discretionem vestram humiliter deprecamur quatinus in continenti expedire nobis nostrum negotium studeatis ne alienus messor sua falce messem vestram et nostram valeat occupare Si id [quod absit] contingeret vobis ad magnum dedecus et nobis ad irreparabile cederet detrimentum Cetera igitur que hic propter prolixitatem evitandam deficiunt nuntii nostri latores presentium vobis plenius explicabunt