Charter Document - 02194496
| Charter Number: | 02194496 |
|---|---|
| Cartulary Title: | Recueil des Chartes de l'Abbaye de Cluny |
| Charter Language: | Latin |
| Charter Origin: | Papal |
| Charter Type(s): | Mandate |
| Date: | 1215 |
| Date type: | Internal, Calendar, Papal |
| Resource Link(s): |
CCE: cartae cluniacenses electronicae |
Charter:
Innocentius Episcopus servus servorum Dei dilectis filiis Priori et conventui Cluniacen salutem et Apostolicam benedictionem Dilectus filius Abbas Cluniacensis nobis humiliter intimavit quod cum vos nuper per spontaneam cessionem predecessoris sui tractaretis de substituendo Pastore inter cetera firmastis juramento quod obedientiam non faceretis electo nisi prius ipse constitutiones bone memorie Petri Cluniacensis Abbatis se jurejurando promitteret servaturum Cumque postmodum convenissetis unanimiter in eumdem et ab eo juramentum exigeretis predictum idem attendens quod juramentum hujusmodi a predecessoribus suis nequaquam prestitum fuerat vel petitum illud noluit ullatenus exhibere Unde nobis humiliter supplicavit ut debitam sibi exhiberi obedientiam et vobis de juramenti temeritate predicti penitentiam injungi congruam faceremus Cum igitur constitutiones prefate absque Cluniacensis Monasterii detrimento nequeant sicut accepimus observari eumdem a juramenti prestatione predicti duximus absolvendum et ei dedimus in mandatis ut vobis pro temerario juramento injungat penitentiam salutarem Quocirca discretioni vestre per Apostolica scripta mandamus quatenus penitentiam quam vobis proinde duxerit injungendam recipientes devote ac humiliter adimplentes non obstante juramento predicto eam obedientiam et reverentiam exhibeatis eidem que suis exhiberi predecessoribus consuevit Datum Laterani VIII Kalendas Novembris Pontificatus nostri anno XVIII