Charter Document - 02194469
| Charter Number: | 02194469 |
|---|---|
| Cartulary Title: | Recueil des Chartes de l'Abbaye de Cluny |
| Charter Language: | Latin |
| Charter Origin: | Papal |
| Charter Type(s): | Mandate |
| Date: | 1213 |
| Date type: | Internal, Calendar, Papal |
| Resource Link(s): |
CCE: cartae cluniacenses electronicae |
Charter:
Innocentius episcopus servus servorum Dei dilectis filiis Sancti Faronis et de Cavea abbatibus et decano Meldensi salutem et apostolicam benedictionem Dilectus filius abbas Cluniacensis sua nobis conquestione monstravit quod cum olim ad domum de Caritate accesserit et in villa ejusdem loci sic teneretur inclusus quod ingressus vel regressus monachorum ac nuntiorum suorum haberi non posset ad ipsum nisi mediante Leterico balivo nobilis viri comitis Nivernensis ut id obtineretur per balivum eundem necessitate urgente idem abbas contra constitutionem Cluniacensem capituli generalis auctoritate apostolica constituti cum consensu Cluniacensis conventus prioratum de Benhardo pertinentem ad ipsum Petro clerico dicti balivi filio contulit in sui gravem monasterii lesionem propter quod nobis humiliter supplicavit ut per discretos viros prioratum premissum faceremus ad proprietatem et jus monasterii antefati veritate cognita revocari Quia vero nobis non constitit de premissis discretioni vestre per apostolica scripta mandamus quatinus vocatis quos propter hoc noveritis evocandos audiatis hinc inde proposita et quod justum fuerit appellatione postposita statuatis ipsi abbati pro suo debito penam canonicam infligentes faciatis quod decreveritis per censuram ecclesiasticam firmiter observari Quod si non omnibus hiis exequendis potueritis interesse duo vestrum ea nichilominus exequantur Vos denique filii abbates super vobis ipsis et credito vobis grege taliter vigilare curetis extirpando vitia et plantando virtutes ut in novissimo districti examinis die coram tremendo judice qui reddet unicuique secundum opera sua dignam possitis reddere rationem Datum Lateranni X kal februarii pontificatus nostri anno quinto decimo