Charter Document - 02194465

Innocentius episcopus servus servorum Dei dilectis filiis [] Pruliacensi Cisterciensis ordinis [] Sancte Columbe et [] Sancti Satiri abbatibus Senonensis et Bituricensis diocesum salutem et apostolicam benedictionem Cum olim grandes et graves deformes et enormes injurie quas Gaufridus tunc prior et conventus monasterii de Caritate dilecto filio Cluniacensi abbati dicebantur temere irrogasse seriatim fuissent exposite coram nobis nos eisdem in apostolicis litteris per ordinem comprehensis venerabilibus fratribus nostris [] Trecensi et Meldensi episcopis ac dilecto filio [] Latiniacensi abbati per ipsas dedimus litteras in preceptis ut ad locum ipsum personaliter accedentes et inquirentes super hiis plenius veritatem si rem invenirent taliter se habere latam propter hoc in dictum G depositionis a regimine prioratus sententiam auctoritate apostolica confirmantes et approbantes nichilominus substitutionem de Willelmo in ipsius loci priorem et dampnationem sigillorum eorumdem G ac conventus per diffinitores generalis capituli factam excommunicationis sententiam in jam dictum G ac ejus complices promulgatam ab ipsis facerent usque ad satisfactionem condignam firmiter observari contradictores quoslibet aut rebelles sive monachi sive clerici sive laici essent per censuram ecclesiasticam appellatione postposita compescendo Cum igitur iidem judices ad predictum monasterium accessissent mandatum apostolicum impleturi monachi loci ejusdem sicut nuper Helyas monachus et magister Guido procuratores Cluniacenses in nostro auditorio recitarunt ipsis januas monasterii quemadmodum abbati Cluniacensi fuerant obserantes eosdem ingredi nullatenus permiserunt Ipsi vero mandatum nostrum exequi cupientes in villa ipsius loci curaverunt super prepositis sollicite inquirere veritatem et cum plene constitisset eisdem prefatos monachos ea que de ipsis nobis insinuata fuerant et graviora etiam commississe dictam depositionis sententiam ac substitutionem prioris dampnationem etiam runt set quia ipsis a pluribus fuerat nuntiatum quod abbas et monachi Cluniacenses qui non parva multitudine stipati advenerant monasterium per violentiam decreverant occupare idem volentes hujusmodi obviare periculo prefatis judicibus humiliter supplicarunt et obtinuerunt ab eis ut in eorum ecclesia Sancti Petri sita juxta idem monasterium convenirent Partibus igitur ibidem in eorum presentia constitutis monachorum proposuit procurator quod dicti judices litterarum nostrarum auctoritate procedere non debebant quia si nobis reseratum fuisset eosdem quod emendabamus in ipsis auctoritate jam esse propria exequtos causam nullatenus comississemus eisdem Unde cum impetratores ipsarum talem supresserint veritatem qua expressa jam dictas litteras ad ipsos minime inpetrassent eis non erat auctoritate illarum ullatenus procedendum presertim cum ejusdem monasterii nuncii propter hoc dudum ad sedem apostolicam accessissent opponens nichilominus alias exceptiones legitimas et multiplices contra eos causas suspicionis allegans ad quas probandas arbitros postulant instanter quibus contempte jure canonico pariter et civili sibi penitus denegatis nostram audientiam appellavit personas et bona monasterii sepe dicti appostolice protectioni supponens set iidem nichilominus una eodemque die ad receptionem testium et publicationem deliberationem consilii et decisionem negocii temere properantes quod per abbatem et diffinitores predictos factum extiterat pro sue voluntatis libito confirmarunt Ad hoc apostolici mandati finibus non contenti cum comitem supradictum ad oppressionem monasterii utpote qui processus iniquitatem noverat inculcatis precibus et preceptis inducere nequivissent ad regem se convertere predictum et regiam puritatem circumvenire multipliciter presumpserunt suggerentes eidem veritati contraria et ipsum quasi ex parte nostra precibus onerantes Qui credens eosdem accensos zelo justicie sic instare comiti memorato precepit ut substituto W predicto temporalia faceret assignari Set jurisperitis quorum consilium idem comes accedens Parisius sollicite requisivit processum judicum predictorum extitisse iniquum concorditer respondentibus eodemque comite propter hoc mandatum regium exequi differente rex ipsorum judicum et Cluniacensis abbatis suggestionibus iterum circumventus contra comitem predictum precepit exercitum congregari et sic comes vi metuque compulsus ad monasterium accessit cum regio marescalco mandatum regis contra propriam voluntatem et conscientiam expleturus Monachi vero subito visa multitudine armatorum contenti se vestibus ecclesiasticis induerunt et sic induti occurrerunt ad monasterii portas opponentes armatis ymagines crucifixi et reverendas sanctorum reliquias ac ipsum Christi corpus sacratissimum obtendentes ac ex parte Dei et nostra prohibentes eisdem ne monasterium apostolice petitioni suppositum presumerent violare Qui licet primo facinus exhorruerint postea tamen per alium competentiorem aditum calcata reverentia irrumpentes sacras ecclesie valvas ausu temerario confregerunt et insano tumultu singula perscrutantes prefato W assignaverunt granarium cellarium dormitorium et officinas monasterii universas fratres loci ejusdem vix in oratorio claustri quo stupefacti confugerant relinquentes ubi necessariis nova eis inhumanitate subtractis et prohibito ne quisquam ipsis audeat aliquid ministrare in tanto sunt necessitatis articulo constituti ut ad vite sustentamentum non habeant nisi quod quidam boni viri eisdem misericordia moti furtim porrigunt per fenestras Unde nobis fuit ex parte ipsorum humiliter supplicatum ut tam gravi calamitati et calamitoso gravamini secundum consuetam apostolice sedis clementiam succurrere dignaremur Nos igitur hiis et aliis que a partibus fuere proposita plenius intellectis quia manifeste cognovimus predictos judices perperam processisse cum ut exceptiones alias taceamus causam nullatenus commisissemus eisdem si nobis revelatum fuisset quod ea que per ipsos exequenda mandavimus auctoritate propria publice denunciaverant per dioceses suas et districte mandaverant observari Unde occasione rescripti per talem subreptionem obtenti nequaquam procedere debuissent quia etiam fines nostri excedentes mandati brachii secularis auxilium invocarunt dum eorum ad nos relatione prudente partes super ipsorum processu in nostro auditorio litigabant cum etiam graviter posset impediri ecclesiastica utilitas et libertas si quolibet judice imperito forsan aut etiam malitioso temere jaculante sententiam rex seu quicumque alius princeps ad ecclesiastica bona manum extenderet quasi eandem executorum sententiam mandaturus ac etiam ex hoc grave posset inter sacerdocium atque regnum scandalum generari quicquid ab eisdem judicibus taliter factum est vel ab aliis per studium eorumdem de fratrum nostrorum consilio irritum decrevimus et inane Verum quia per expressam confessionem monachorum de Caritate nobis constitit evidenter Cluniacensem abbatem possessionem instituendi ac destituendi pro sue libito voluntatis in monasterio de Caritate priores et corrigendi ac ordinandi que corrigenda et ordinanda vidisset per viginti annos licet dicti monachi de Caritate eandem usurpatam asserant habuisse nos exigente justicia sibi ejusdem possessionis commodum conservantes tam destitutionem dicti G a regimine prioratus quam substitutionem prefati Willelmi et sigillorum dampnationem jam dictam excommunicationis quoque sententiam quam in eumdem G et ejus complices idem abbas propter rebellionem hujusmodi promulgavit auctoritate apostolica duximus confirmandas Ideoque discretioni vestre per apostolica scripta mandamus quatinus premissas destitutionis et institutionis ac dampnationis sigillorum sententias facientes per censuram ecclesiasticam sublato appellationis obstaculo firmiter observari ac thesaurum privilegia libros cartas et universa ecclesiastica ornamenta a quibuscumque alienata fuerint vel substracta monasterio restitui memorato dicto abbati ex parte nostra firmiter injungatis ut possessionibus et aliis quibus monachi memorati per dictos comitem et marescalcum seu quoscumque alios spoliati fuerint eorum priori ac ipsis plenarie restitutis eisdem beneficium absolutionis impendat et paterna ipsos benignitate pertractet ac possessiones alienatas in enormem ejusdem monasterii lesionem ad jus et proprietatem ipsius secundum formam in nostris litteris comprehensam juxta quod in nostra presentia ejus monachi anno preterito promiserunt studeat nunciare Ceterum si dicti prior et monachi de Caritate omnis vel major aut sanior pars eorum super libertate monasterii sui de jure voluerint experiri nos eos benigne cum requisiti fuerimus audiemus sicut videbimus expedire Taliter autem satagat ipse abbas pacificare et reformare statum monasterii memorati conservando rationes et immunitates ipsius ne nos propter ejus negligentiam aut insolentiam compellamur de dicto monasterio aliud ordinare Quod si non omnes hiis exequendis poteritis interesse duo vestrum ea nichilominus exequantur Vos denique filii abbates super vobis ipsis et creditis vobis gregibus taliter vigilare curetis extirpando vicia et plantando virtutes ut in novissimo districti examinis die coram tremendo judice qui reddet unicuique secundum opera sua dignam possitis reddere rationem Datum Lateranni XIIII kalendas januarii pontificatus nostri anno quinto decimo