Charter Document - 02184470
| Charter Number: | 02184470 |
|---|---|
| Cartulary Title: | Recueil des Chartes de l'Abbaye de Cluny |
| Charter Language: | Latin |
| Charter Origin: | Religious |
| Charter Type(s): | History |
| Date: | 1100 |
| Date type: | Assigned |
| Resource Link(s): |
CCE: cartae cluniacenses electronicae |
Charter:
Quotienscumque ad expugnandam calumniam illorum quorum perversitas sanctuarium Dei dissipat quorumque stulta temeritas elemosinas pia justorum largitione matri ecclesie collatas scutum defensionis arripimus necessaria perplurimum noticia litterarum forte dinoscitur Et ideo ut in series primi libri aureum tempus et lucida gesta domni deprompsit Bernonis sic prosecutio omnium donationum carismata a fidelibus viris tempore predicandi patris domni videlicet Oddonis monasterio attributa satis evidenter declarabit Sed interim non ab re nobis videtur digressionem quandam ab oratione facere ut ignorantibus vitam viri qualis tum erit valeamus intimare Fuit igitur ut veridica priorum relatione fertur nobili prosapia satus Cynomannica regione exortus arcium liberalium adprime regulis imbutus almi Martini Turonensis basilice edituus sermone clarus vita nitidus societate jocundus et quod his omnibus excelsius est sacre doctrine roseo flore decenter ornatus Ut enim de relictis minus gerendis ad anteriora extentus juxta apostolum vir perfectionis effectus filiorum Recab emulatione ductus est luteas sedes habere contempsit in terra quatinus Christo mereretur jungi in ecclesie camera Delibutus proinde odore virtutum quem id temporis Cluniacensis rumor preciosorum more aromatum longe lateque profuderat mente prompta quod diu concupierat tenebrosi reliquit rura lugente cive in patria letante Christo in gloria divino jugo mitia subposuit colla Tyrocinio denique sue conversionis non segniter peracto precatione patris circumventus cujus institutis fuerat mancipatus volens nolens et ut verius dictum sit nolens totius fraternitatis ad regendum suscepit examen Quanta deinde acrimonia excelsos animos sternere qualive cautela vitia resecare quaque benignitate virtutes inserere studuit non ignorat Italia protestatur Burgundia simulque refert Gallia Prophetie denique gratia suffusus ex hoc certissime approbatur dum suprema sorte preventus contatione fratrum requisitus quis ex tanto collegio ceteris preficeretur alto flamine afflatus sic ad eos respondisse fertur Nostra in hoc o filii vacillante censura Christi Domini larga non deerit prudentia que et domui sue sanctum providebit pastorem et vobis rogitantibus famulis dignum non denegabit pastorem Quod scilicet sane considerantibus sole lucidius patet dum vita et conversatio domni Heymardi satis abunde experimentum prebet Huc usque siquidem de tanti viri laudanda nobilitate brevi peroratum sufficiat quatinus ex hoc intellegatur quantopere oportet nos inherere illius scitis quem pro merito non ambigimus insertum angelorum cuneis Sin autem scrutinio fideli percunctari temptaverit quanta et qualia prelibati patris industria usibus monachorum in Cluniacensi loco degentium perseverant adquisita acie oculorum erecta sequentia relegat ibi repperire poterit non minima