Charter Document - 02184454
| Charter Number: | 02184454 |
|---|---|
| Cartulary Title: | Recueil des Chartes de l'Abbaye de Cluny |
| Charter Language: | Latin |
| Charter Origin: | Religious |
| Charter Type(s): | Grant |
| Date: | 1210 |
| Date type: | Internal, A.D. |
| Resource Link(s): |
CCE: cartae cluniacenses electronicae |
Charter:
Reverendo patri et domino Willelmo abbati Cluniacensi et ejusdem ecclesie sacro conventui Antelmus Dei gratia Patracensis ecclesie archiepiscopus salutes in Deo salutari nostro et debitam reverentiam Cum sim filius et alumpnus ecclesie Cluniacensis quicquid boni vel honesti in me [quamvis parum sit] repperio id ipsum a matre mea Cluniacensi ecclesia habui et quoniam de jure cautum est ut si filius vel servus ingratus extiterit in Domini potestate servus redeat vel filius exheredetur ego autem non ingratus set beneficiorum in me collatorum memor ob salutem anime mee et tocius conventus ecclesie nostre ex consensu ipsius conventus donamus et tradimus vobis et successoribus vestris et conventui Cluniacensi domum Sancte Marie de Ierocomata cum omnibus appenditiis suis sitam prope civitatem Patracensem ita liberam ab omnibus exactionibus quod successores nostri nullum gravamen nec procurationem aliquam possint a vobis exigere neque vos possint compellere venire ad synodum set ipsa domus quam vobis concessimus annuatim unum optimum exsamitum expensis suis vobis transmittat et nos domui predicte de reditibus nostris assignabimus unde istud solvere possit rogantes ut in capitulo presentetur et orationes a conventu pro donatoribus Deo offerantur et pro ipso donatore tricennarium fiat et pro successoribus suis archiepiscopis similiter De fratribus vero si breves eorum ad vos pervenerint tanquam uni de fratribus vestris qui de obedientiis vestris venerint idem offitium persolvatis pro eis Actum ab incarnatione Domini millesimo ducentesimo decimo