Charter Document - 02184448

Innocentius Episcopus servus servorum Dei dilectis filiis Abbati et Conventui Cluniacensi salutem et Apostolicam benedictionem Venientibus ad Apostolicam Sedem dilectis filiis sancto Monacho vestro ac H Monasterii S Benedicti Super Padum procuratoribus idem S proposuit coram nobis quod cum Monasterium memoratum a felicis recordationis Gregorio Papa predecessore nostro Hugoni predecessori tuo fili Abbas et successoribus ejus fuerit dudum commissum ut in ejus gubernatione atque custodia et potestatem haberent et studium procurationis impenderent ac Abbate obeunte ipsius loci eorum diligentia provideret ut in loco regiminis juxta beati Benedicti regulam persona subrogaretur idonea et quidquid in Monasterio ad augmentum et observantiam monastice religionis institui vel emendari etiam oporteret eorum semper dispositione ac ministerio impleretur prout in felicis memorie Lucii et Clementis predecessorum nostrorum authenticis asseruit contineri Abbas et fratres Monasterii supradicti debitam tibi fili Abbas et Ecclesie tue obedientiam et reverentiam subtrahentes super premissis et aliis injuriosi tibi et graves existunt et a tua et Ecclesie tue subjectione se ac Monasterium suum subtrahere molientes iidem quoque fratres Abbatem sibi eligere non formidant absque tuo et fratrum tuorum consensu Procurator vero Monasterii sancti Benedicti proposuit ex adverso quod cum Monasterium ipsum ad jus et proprietatem Romane Ecclesie pertineat et per privilegia Pontificum Romanorum fuerit ab antiquo libertate donatum tibi vel Ecclesie tue subesse vel respondere in aliquo minime tenebatur quinimo ad fratres ejusdem loci tam dispositio quam Abbatis electio pertinebat Adiiciens quod et si jus aliquod predictorum privilegiorum intuitu Cluniacensi Ecclesie competierit illud penitus est absorptum cum hactenus neglexerit uti eis et monasterium supradictum longissimo tempore plena fuerit libertate gavisum Proposuit insuper idem Monasterium super capitulis prenotatis per bone memorie Eugenii Pape predecessoris nostri sententiam fuisse absolutum Cum ergo super his et quibusdam aliis procuratores ipsi non desinerent altercari et per venerabiles fratres nostros I Sabinensem et N Tusculanensem Episcopos de mandato nostro fuerit de amicabili compositione tractatum nobis mediantibus demum inter procuratores ipsos hujusmodi compositio intervenit ut cum in Monasterio sepe dicto fuerit Abbatis electio celebranda fratres ejusdem loci absque requisitione vestra personam idoneam regulariter sibi eligant in Abbatem qui si concorditer electus extiterit munus benedictionis accipiat et libere administret nulla super his a vobis licentia ex petita ita videlicet quod is qui fuerit in Abbatem electus intra spatium primi anni unum vel duos fratres cum suis litteris ad vos dirigat in quibus tibi fili Abbas et successoribus tuis super observantia Monastici Ordinis obedientiam promittat et tunc Cluniacensis Abbas vel per se vel per alium ad Monasterium memoratum accedat ab Abbate ipsius loci corporalem super Ordinis observantia obedientiam recepturus vel transmissas sibi litteras si maluerit in testimonium obedientie sibi promisse reservet Quod si Abbatis electio fuerit in discordia celebrata pro dirimendo hujusmodi dissensionis articulo ad Sedem Apostolicam recurratur Item Abbas et Monachi supradicti loci de quadriennio in quadriennium aliquem ex confratribus suis ad capitulum Cluniacense transmittant qui audiat et recipiat que ibidem fuerint super observantia ordinis constituta Preterea quolibet quadriennio Cluniacensis Abbas duos ex fratribus suis mittat ad visitandum Monasterium sepedictum quibus decenter ac benigne receptis ab eodem Monasterio moderata procuratio tribuatur et ipsius Abbatis ejusdem loci consilio requisito corrigant si quid in ipso Monasterio circa Monachos et conversos aliasque personas corrigendum invenerint et statuant quod circa eos fuerit statuendum si vero aliquid corrigendum in Abbate invenerint ad Romanum Pontificem id referant et sicut ipse mandaverit in ejus correctione procedant Cum autem Cluniacensis Abbas ad Monasterium sepefatum accesserit Abbas ejusdem loci tanquam Priori Abbati cedat in Choro in Capitulo et in mensa Abbas vero Cluniacensis in membris corrigens quod fuerit corrigendum si quid forte in Abbatis persona correctione dignum invenerit id ad aures Romani Pontificis deferre procuret ut juxta beneplacitum ejus in Christo negotia procedant Preterea Cluniacensis Abbas ad Monasterium jam dictum accedens vigintiquinque equitaturis et triginta personis fratres vero cum illuc causa visitationis accesserint quatuor equitaturis et sex personis tantummodo sint contenti Ut igitur in perpetuum compositio supra scripta de procuratorum assensu facta inviolabiliter observetur nos eam auctoritate Apostolica confirmamus statuentes ut nulli omnino hominum liceat hanc paginam nostre confirmationis infringere vel ei ausu temerario contraire Si quis autem hoc attentare presumpserit indignationem omnipotentis Dei et beatorum Petri et Pauli Apostolorum ejus se noverit incursurum Datum Viterbii IV Idus Julii Pontificatus nostri anno duo decimo