Charter Document - 02184370
| Charter Number: | 02184370 |
|---|---|
| Cartulary Title: | Recueil des Chartes de l'Abbaye de Cluny |
| Charter Language: | Latin |
| Charter Origin: | Religious |
| Charter Type(s): | Promise |
| Date: | 1197 |
| Date type: | Internal, A.D., Calendar |
| Resource Link(s): |
CCE: cartae cluniacenses electronicae |
Charter:
Ego Rainaldus Dei gratia Matisconensis episcopus notum facio presentibus et futuris quod Willelmus comes Matisconensis in manu nostra interposita fidei religione firmavit quod donec conventus Cluniacensis arbitrio nostro vel successorum nostrorum servato juris ordine stare voluerit de querela quantumlibet grandi si quam contra eundem conventum idem comes habuerit caldariam ipsorum quam habent apud Ledonem non occupabit nec faciet vel permittet ab aliquo hominum suorum subreptione qualibet occupari Quod si [absit] suadente humani generis inimico fecerit nec infra quatuordecim dies postquam commonitus fuerit ab eodem conventu id competenti satisfactione correxerit tunc nos vel successores nostri personam ipsius comitis et universam terram ejus interdicto et excommunicationi sine omni procrastinatione subdemus nec sententiam relaxabimus donec dicto conventui caldaria fuerit cum perceptis inde proventibus in integrum restituta et de illata injuria congrue satisfactum Actum Matiscone anno incarnati Verbi MCXCVII kalendis maii