Charter Document - 02184360
| Charter Number: | 02184360 |
|---|---|
| Cartulary Title: | Recueil des Chartes de l'Abbaye de Cluny |
| Charter Language: | Latin |
| Charter Origin: | Papal |
| Charter Type(s): | Mandate |
| Date: | 1192 |
| Date type: | Internal, Papal |
| Resource Link(s): |
CCE: cartae cluniacenses electronicae |
Charter:
Celestinus Episcopus servus servorum Dei venerabili fratri Senonensi Archiepiscopo et dilecto filio Abbati sancte Columbe in Senonensi Diecesi constituto salutem et Apostolicam benedictionem Ex insinuatione dilectorum filiorum Abbatis et Conventus Cluniacensis nos accepisse noveritis quod cum Prioratus eorum de Charitate tempore quo carissimus in Christo filius noster Philippus illustris Francorum Rex Hierosolymam profectus est in penitentia et peccatis habitantium exigentibus nimio fuisset debitorum onere gravatus et Petrus de Croyon serviens nobilis viri Comitis Nivernensis nimium ipsos affligeret et gravaret Prior et fratres ejusdem loci domum de Colenges ad ipsum Priorem spectantem pro tredecim mille solidis inveniendis ipsi Priori venditioni exponere sunt coacti unde Prioratus de Charitate damnificatus est plurimum et gravatus Et licet ipse Comes ad instantiam predicti Abbatis Cluniacensis postmodum in presentia venerabilis fratris nostri W Rhemensis Archiepiscopi sancte Sabine Cardinalis Apostolice Sedis Legati tunc curam et sollicitudinem Regni Francie simul cum charissima in Christo filia nostra illustri Regina Francorum matre Regis ipsius gerentis tactis sacrosanctis Evangeliis juramento firmavit quod Priori et fratribus de Charitate reipsa pecunia sua domum pretaxatam cum omnibus pertinentiis redderet pacifice possidendam numquam postmodum quamvis ipsi fratres ut dicitur pecuniam illam ei vellent restituere illud quod juraverat voluit adimplere Cum igitur cura et sollicitudo omnium Ecclesiarum sit nobis commissa volentes indemnitati ipsius Prioratus de Charitate prout debemus paterno affectu sollicite providere discretioni vestre per Apostolica scripta mandamus firmiter injungentes quatinus supra dictum Comitem Nivernensem qui eamdem domum de Colenges servientis nomine sicut dicitur occupavit et in proprios usus convertit ut ipsum servientem si predicta domus ei fuit restituta auctoritate nostra monere et inducere efficaciter laboretis ut domum ipsam Prioratui supradicto recepta ab ipsis pecunia restituta sine difficultate qualibet restituere non omittat et si quid in ipsa domo ab ipso Comite vel predicto serviente superedificatum est non computetur ipsis fratribus sed de reditibus domus ipsius receptis illud fiat Si non idem Comes aut ipse serviens duxerit restituendum vos nostra freti auctoritate tam ipsum Comitem quam quoslibet alios domum ipsam tenentes ad eamdem domum cum pertinentiis prefatis fratribus per excommunicationis et interdicti sententias sublato contradictionis et appellationis obstaculo compellatis facientes utramque sententiam usque ad condignam satisfactionem inviolabiliter observari nullis litteris obstantibus a Sede Apostolica impetratis Quod si ambo eis exequendis nequiveritis interesse tu frater Archiepiscope ea nihilominus exequaris Datum Laterani VIII Idus Augusti Pontificatus nostri anno sexto