Charter Document - 02184312
| Charter Number: | 02184312 |
|---|---|
| Cartulary Title: | Recueil des Chartes de l'Abbaye de Cluny |
| Charter Language: | Latin |
| Charter Origin: | Papal |
| Charter Type(s): | Mandate |
| Date: | 1186 - 1187 |
| Date type: | Assigned |
| Resource Link(s): |
BnF Département des Manuscrits - NAL 2265 (p33) CCE: cartae cluniacenses electronicae |
Charter:
Urbanus [episcopus servus servorum Dei dilectis filiis] Hugoni abbati et conventui Cluniacensis [salutem et apostolicam benedictionem] Quanto specialius cenobium vestrum [beati Petri juris existit et ad nostram provisionem nullo mediante pertinet et tutelam ac vos et predecessores vestri in eo celestis magisterio subditi discipline per infusionem sancti Spiritus odorem honestatis et Religionis in vestro hactenus ordine observate latius expendistis tanto ad conservandum jura vestra illesa et justas devotionis vestre petitiones benignius admittendas tenemur] existere promptiores Pervenit autem ad nos quod cum nobilis vir P[etrus] Nivernensis comes monasterio vestro Sancti Stephani Nivernensis multa dampna et injurias intulisset tandem litterarum nostrarum auctoritate commonitus a suo facto resipuit et libertatem burgi predicti Sancti Stephani Nivernensis prout debuit recognovit et eam se promisit juramento prestito servaturum compositionem quoque ab eodem comite et Agnete uxore ejus cum fratribus vestris predicti Sancti Stephani amicabiliter factam ad memoriam futurorum scriptis autenticis roborarunt quam karissimus in Christo filius noster Philippus illustris Francorum rex ratam habuit et nihilominus sui scripti munimine confirmavit Nos itaque vestris postulationibus annuentes compositionem illam sicut inter prefatos fratres vestros et jam dictum comitem et uxorem ejus de assensu partium facta est et non solum eorum sed etiam ipsius regis scriptis autenticis roborata ratam habemus eamque futuris temporibus manere decernimus illibatam Ad hec compositionem inter Artaldum Album dominum Castri Novi et fratres vestros de Amberta super multis dampnis et gravaminibus que eis irrogaverat initam sicut de assensu partium facta est et in predicti viri autentico continetur ne processu temporis rescindatur ad peticionem vestram similiter ratam habemus eamque auctoritate nostra et presentis scripti patrocinio communimus Statuentes [ut nulli omnino hominum liceat hanc paginam nostre confirmationis infringere vel ei ausu temerario contraire] Si quis [autem hoc attentare presumpserit indignationem omnipotentis Dei et beatorum Petri et Pauli Apostolorum ejus se noverit incursurum] Datum Verone x kalendas septembris