Charter Document - 02184306
| Charter Number: | 02184306 |
|---|---|
| Cartulary Title: | Recueil des Chartes de l'Abbaye de Cluny |
| Charter Language: | Latin |
| Charter Origin: | Papal |
| Charter Type(s): | Mandate |
| Date: | 1186 |
| Date type: | Assigned |
| Resource Link(s): |
CCE: cartae cluniacenses electronicae |
Charter:
Urbanus Episcopus servus servorum Dei dilectis filiis Abbati et Conventui Clun Salutem et Apostolicam Benedictionem Quanto Monasterium vestrum majori dudum Religione floruit et plures exemplo vestro Creatoris se obsequio manciparunt tanto vos et Monasterium vestrum arctiori debemus charitate diligere et a quorumlibet gravamine propensius defensare Sicut autem ex parte vestra nostris est auribus nunciatum quidam Ecclesiarum Prelati qui ex consuetudine debent a vestris Prioratibus procurari sepe licet ad Prioratus ipsos nequaquam accedant exterius in quibusdamque villulis procurationes sibi exigunt exhiberi cum hoc facere minime consueverint et sine gravioribus expensis eorum super hoc non possit satisfieri voluntati Unde nos gravamini vestro in hac parte providere volentes presentis scripti pagina duximus inhibendum ne aliqui Prelati a Prioratibus vestris malitiose contra antiquam consuetudinem extra eos procurationes exigere aut extorquere presumant Nulli ergo omnino hominum liceat hanc paginam nostre inhibitionis infringere vel ei ausu temerario contraire Si quis autem hoc attentare presumpserit indignationem omnipotentis Dei et beatorum Petri et Pauli Apostolorum ejus se noverit incursurum Datum Verone VIII Kal Aprilis