Charter Document - 02184262
| Charter Number: | 02184262 |
|---|---|
| Cartulary Title: | Recueil des Chartes de l'Abbaye de Cluny |
| Charter Language: | Latin |
| Charter Origin: | Papal |
| Charter Type(s): | Mandate |
| Date: | 1178 |
| Date type: | Internal, A.D., Calendar, Papal |
| Resource Link(s): |
CCE: cartae cluniacenses electronicae |
Charter:
Alexander Episcopus servus servorum Dei dilectis filiis Abbati et Capitulo Cluniac Ecclesie tam presentibus quam futuris Regularem vitam professis in perpetuum Quanto specialius Ecclesia vestra nobis est nullo mediante subjecta tanto propensius ejus juri providere compellimur ne super his que rationabiliter noscitur possidere processu temporis indebita molestatione gravetur Ea propter dilecti in Domino filii vestris justis postulationibus clementer annuimus et Ecclesiam vestram in qua estis divino obsequio mancipati sub B Petri et nostra protectione suscipimus et presentis scripti privilegio communimus Statuentes ut quascumque possessiones quecumque bona eadem Ecclesia in presentiarum juste et canonice possidet aut in futurum concessione Pontificum largitione Regum vel Principum oblatione fidelium seu aliis justis modis prestante Domino poterit adipisci firma vobis vestrisque successoribus et illibata permaneant Preterea Prioratum sancte Marie de Nazara cum omnibus pertinentiis suis et Prioratum sancte Trinitatis de Lentona cum omnibus pertinentiis suis sicut eosdem Prioratus Ecclesia vestra Canonice possidet et de donatione predicti Prioratus S Marie in scripto authentico continetur vobis et eidem Ecclesie auctoritate Apostolica confirmamus Decernimus ergo ut nulli omnino hominum liceat prefatam Ecclesiam temere perturbare aut ejus possessiones auferre vel ablatas retinere minuere aut quibuslibet vexationibus fatigare sed omnia integra conserventur eorum pro quorum gubernatione et sustentatione concessa sunt usibus omnimodis profutura salva Apostolice sedis auctoritate Si qua igitur in futurum Ecclesiastica secularisve persona hanc nostre constitutionis paginam sciens contra eam temere venire tentaverit secundo tertiove commonita si non satisfactione congrua emendaverit potestatis honorisque sui careat dignitate reamque se divino judicio existere de perpetrata iniquitate cognoscat et a sacratissimo corpore et sanguine Dei et Domini Redemptoris nostri Jesu Christi aliena fiat atque in extremo examine divine ultioni subjaceat Cunctis autem eidem loco sua jura servantibus sit pax Domini nostri Jesu Christi quatinus et hic fructum bone actionis percipiant et apud districtum judicem premia eterne pacis inveniant Amen Amen Amen Ego Alexander Catholice Ecclesie Episcopus Ego Hubaldus Hostiensis Episcopus Ego Joannes Presbyter Card SS Joannis et Pauli tit Pammachii Ego Bozo Presb Card S Pudentiane tit Pastoris Ego Petrus Presbyter Card tit S Susanne Ego Vivianus Presbyter Card tit sancti Stephani in Celio monte Ego Jacobus Diaconus Card S Marie in Cosmedin Ego Ardicio Diaconus Cardinalis S Theoderici Ego Cincius Diaconus Cardinalis S Adriani Ego Laborans Diaconus Card S Marie in Porticu Ego Rainerius Diaconus Card S Georgii ad velum aureum Datum Laterani per manum Alberti S R E Presbyteri Cardinalis et Cancellarii XV Kalendas Maii Indict XI Incarnat Dominice anno MCLXVIII Pontificatus vero Domni Alexandri Pape III ann XIX