Charter Document - 02184254

Alexander Episcopus servus servorum Dei dilectis filiis Rodulpho Abbati et fratribus Monasterii Cluniac salutem et Apostolicam benedictionem Quanto vos et Ecclesiam vestram que ad jurisdictionem beati Petri et nostram provisionem specialiter nullo mediante noscitur pertinere intuitu Religionis devotionis et fidei qua noscimini largiente Domino preeminere arctiori Charitate diligimus tanto vobis potius volumus in neccessitatibus vestris adesse et jura vestra propensiori studio et sollicitudine conservare ac vobis in quibus expedit gratie nostre favorem et tuitionis presidium diligentius impertiri Sane per dilectum filium nostrum I Monachum vestrum a nobis devote ac suppliciter postulastis quod thesaurum Ecclesie vestre honores ac possessiones et obedientias quas in presentiarum eadem Ecclesia possidet aut in futurum auctore Domino juste poterit adipisci Te fili Abbas et quemlibet successorum tuorum absque communi consensu Capituli distrahere vel alienare deberemus districtius prohibere Nos igitur commodis ac profectibus vestris cupientes ferventer intendere et Monasterium vestrum volentes auctore Domino in quiete perpetua et tranquillitate persistere ut ibidem a secularibus tumultibus liberi omnipotentis Dei servitio vacare quietius valeatis auctoritate Apostolica sub interminatione Anathematis prohibemus ut tibi vel cuilibet successorum tuorum nullatenus liceat thesaurum memorate Ecclesie vestre quem nunc possidet vel recuperare seu justis modis auctore Domino acquirere poterit honores etiam possessiones sive obedientias ipsius sine communi consensu Capituli vel sanioris partis distrahere vel quolibet titulo personis extraneis obligare Datum Anagnie XVII Kalendas Februarii