Charter Document - 02184229
| Charter Number: | 02184229 |
|---|---|
| Cartulary Title: | Recueil des Chartes de l'Abbaye de Cluny |
| Charter Language: | Latin |
| Charter Origin: | Papal |
| Charter Type(s): | Mandate |
| Date: | 1168 - 1178 |
| Date type: | Assigned |
| Resource Link(s): |
CCE: cartae cluniacenses electronicae |
Charter:
Alexander Episcopus servus servorum Dei Venerabilibus fratribus Parisiensi et Silvanectensi Episcopis et dilecto filio Abbati sancti Remigii Remensis salutem et Apostolicam benedictionem Dilecti filii nostri Abbas et fratres Cluniacenses per nuntium suum nobis significarunt quod Hu Pincerna charissimi in Christo filii nostri L Illustrissimi Francorum Regis eis nemus quod sagitta vocatur contra justitiam presumpsit auferre ipseque sibi reddere penitus contradicit Quoniam igitur jura predictorum fratrum tanto studiosius manutenere et conservare tenemur quanto eorum Monasterium ad jurisdictionem beati Petri ac nostram noscitur specialius pertinere discretioni vestre per Apostolica scripta precipiendo mandamus quatenus predictum Hu studiosius moneatis et cum omni diligentia laboretis inducere ut memorato Abbati et fratribus prefatum nemus cum universis ablatis libere et sine contradictione restituat et in pace deinceps et quiete dimittat vel sub vestre discretionis examine plenam exinde sibi justitiam exhibeat Si autem infra viginti dies post harum susceptionem neutrum horum adimplere voluerit eum publice appellatione remota excommunicatum denuntietis et in tota terra ipsius omnia divina preter baptisma parvulorum et penitentias morientium prohibeatis officia celebrari nec excommunicationis vel interdicti sententiam sine satisfactione congrua relevetis Datum Anagnie undecimo Calendas Januarii