Charter Document - 02184203

Alexander episcopus servus servorum Dei venerabili fratri Henrico Belvacensi episcopo salutem et apostolicam benedictionem Illa ardentis charitatis constantia et sincerissime devotionis affectio quam in tempore procelloso et turbido circa sacrosanctam Romanam Ecclesiam et personam nostram fideliter ostendisti nos admonet et inducit ut quod a te circa Ecclesiam Dei utilissime gestum est immensis laudum preconiis extollamus et hoc in nobis efficit ut obsequium tam gratissimum a nostra et fratrum nostrorum memoria nullo tempore dilabatur Dilecti siquidem filii nostri Henricus Oddo sancte Romane Ecclesie cardinales et apostolice sedis legati nobis jam sepe et sepius retulerunt licet hoc ipsum ex communi et publica fama et ex ipso effectu operis manifestius agnoscamus qualiter te pro domo Dei murum inexpugnabilem opposueris qualiter schismaticos et hereticos potentissime confutaveris et animum charissimi filii nostri Ludovici illustris regis Francorum fratris tui et aliorum tam secularium principum quam ecclesiasticorum virorum multis persuasionibus in catholice Ecclesie firmaveris unitate Ex eorumdem etiam cardinalium relatione cognovimus quanto tempore eos et familias ipsorum in domo propria retinueris et expensis tuis quam late quam liberaliter procuraveris et quanta eos studueris charitatis affectione tractare Nostram vero receptionem que in concilio in Francia celebrato solemniter facta est magis quam tibi nulli mortalium imputamus cujus quidem studio vigilantia et labore et animi hesitantium ad veritatis sunt semitam revocati et in devotione Ecclesie persistentes in ea firmitas roborati Unde quoniam proventum et exaltationem sancte Romane Ecclesie ad honorem et promotionem tuam et commisse tibi Ecclesie non est dubium pertinere predictum filium nostrum regem inducas modis omnibus et horteris ut in ea quam cepit Ecclesie devotione permaneat et rebelles qui in ejus regno existunt ad obedientiam et fidelitatem Ecclesie ac nostram regia auctoritate compellat Porro quia Hugo Cluniacensis dictus abbas in anime sue periculum ab Ecclesie unitate recessit et in hereticam et schismaticam pestilentis Octaviani corruit pravitatem habito fratrum nostrorum concilio eum excommunicatum denuntiamus et negotium ipsum discretioni tue duximus injungendum fraternitati tue per apostolica scripta mandantes quatenus memorati filii nostri regis consilio habito et favore cujus quidem regnum occasione ista per eumdem abbatem infestari posset et plurimum molestari continuo acceptis his litteris Cluniacum accedas et omni appellatione cessante eum apostolice sedis auctoritate deponas et cum consilio catholicorum fratrum ipsius monasterii alium in loco ejus substituere non moreris privilegio a sede apostolica Cluniacensi Ecclesie indulto nullum tibi super depositione ipsius abbatis impedimentum prestante Dignum est enim ut qui se ab Ecclesie unitate subtraxit expers dignitatis ecclesiastice pro sue malitie merito habeatur Quod si ad ejus depositionem procedere forte non poteris et heretica perversitate relicta ad sinum matris Ecclesie voluerit remeare tam eum quam complices suos si et ipsi ad obedientiam nostram duxerint redeundum vice nostra recipias et a sententia qua tenentur excommunicationis absolvas juramento quidem prius ab eis suscepto sicut in subsequentibus continetur [] Ad hoc nihilominus experientie tue mandamus ut quibuscunque modis poteris studeas et efficias quod Ymarum schismaticum et hereticum Tusculanum quondam episcopum capias vel a monasterio prorsus ejicias Dilectos vero filios nostros R latorem presentium et socios ejus qui in fidelitate Romane Ecclesie permanserunt ad ipsum monasterium tecum adducas et eos in statum suum quiete facias ac pacifice permanere Dilectum predictum filium nostrum R Cluniacensis Ecclesie monachum charitati tue petimus esse interventu nostro attentius commendatum Datum Anagnie VII Idus Aprilis XLI