Charter Document - 02184199

Alexander Episcopus servus servorum Dei Venerabili Stephano Cluniacensi Abbati ejusque successoribus regulariter substituendis in perpetuum Cum omnium fidelium petitionibus et necessitatibus subvenire debeat Apostolice charitatis gratia multo magis his est impartienda ejus beneficii clementia quos singulariter proprios et speciales filios se gaudet habere Romana mater Ecclesia Inter quos quoniam Cluniacensis Congregatio divino charismate ceteris imbuta plenius alter Sol enitet in terris adeo ut his nunc temporibus ipsis potius conveniat quod a Domino dictum est Vos Estis Lux Mundi eo magis o charissime Stephane sublimitatis Apostolice auctoritas cogitur prebere vestris petitionibus assensum cum etiam pro sanctimonia vite desideriis vestris parere novimus Auctorem omnium Ea propter quicquid libertatis quicquid tuitionis quicquid auctoritatis predecessores nostri Ecclesie Romane Pontifices presertim Apostolice memorie Gregorius septimus vestro Monasterio et locis ad id pertinentibus contulerunt nos quoque presenti decreto auctoritate nostra confirmamus Scilicet ut cuncta loca et Monasteria ad Cluniacense Cenobium pertinentia que ab aliquibus fidelibus Christianis Regibus Episcopis Ducibus Comitibus seu Principibus eidem loco sunt concessa et ab antecessoribus tuis acquisita et quecunque ad eundem locum aliquomodo pertinere videntur vel in posterum dabuntur sive Terre sive Ecclesie sive Decime et quecunque quorumcunque fidelium beneficia absque ullius contradictione cum magna quiete et securitate tu et tui possideatis et per te universi successores tui in perpetuum Necnon sub divini judicii promulgatione et confirmatione et anathematis interdictione corroborantes decernimus ut nullus Episcopus seu quilibet Sacerdotum in eodem venerabili Cenobio neque omnino in aliquo loco huic subdito pro aliqua ordinatione seu consecratione Altaris vel Ecclesie Presbyterorum vel Diaconorum Missarumque celebratione nisi ab Abbate ejusdem Cenobii vel Prioribus eidem Cenobio subditis invitatus fuerit venire ad agendum presumat sed liceat Monachis tuis ubicumque positis cujuscunque voluerint ordinationis gradum suscipere ubicumque tibi et illis vestrisque successoribus placuerit Interdicimus autem sub simili anathematis promulgatione ut neque Cluniacum neque loca ad id pertinentia ullius cujuscunque Episcopi vel Sacerdotis deprimantur interdictionis titulo seu excommunicationis vinculo vel anathematis Non enim patitur sancte Sedis Apostolice auctoritas ut ullius cujuscunque persone obligatione proscindatur a se cujuslibet concessa libertatis potestas Non igitur Fratres tui ac Monachi ubicumque positi cujuscunque Episcopi maledictionis vel excommunicationis seu interdictionis vinculo teneantur astricti Quod si quis sciens hanc nostram paginam contra hoc facere presumpserit auctoritate Beati Petri Apostoli cui conditor omnium ligandi atque solvendi potestatem commisit et nostra ipsi Monachi absolvantur et is quicunque sit qui Apostolice Sedis filium ligare sive maledicere contra decretum nostrum voluit maledictione ipsa ligetur anathematizetur et condemnetur Si qua vero competens ratio adversus quemquam et hoc aliter determinari vel definiri nequiverit judicium Apostolicum quod nulli prejudicium pretendere patitur super hoc patienter prestoletur et humiliter requiratur Liceat quoque vobis et Fratribus vestris ubicumque positis Ecclesias in manibus vestris tenere earum fructus et beneficia percipere in Ecclesiis Presbyteros ad voluntatem vestram eligere ita tamen ut ab Episcopis vel Episcoporum Vicariis animarum curam absque venalitate suscipiant quam si committere illi quod absit ex pravitate sive indignatione noluerint tunc Presbyteri ex Apostolice Sedis benignitate et auctoritate sine alicujus persone impedimento vel contradictione officia divina solemniter celebrandi licentiam consequantur Ecclesiarum vero seu Altarium consecrationes ab Episcopis in quorum diecesibus sunt locorum vestrorum Fatres accipiant si quidem gratis ac sine pravitate voluerint exhibere alioquin a Catholico quem maluerint Episcopo consecrationum ipsarum Sacramenta suscipiant Decernimus etiam et illius cujus vice quamvis indigni fungimur auctoritate sancimus ut idem locus et loca ei subdita omnibus ob salutem confugientibus sint misericordie sinus sint totius pietatis et salutis portus Obtineat in his locum justus nec repellatur penitere volens iniquus Prebeatur innocentibus charitas mutue fraternitatis nec negetur offensis spes salutis et indulgentia pietatis Et si aliquis cujuscunque obligatus anathemate eundem locum vel loca ei subdita expetierit sive pro corporis sepultura seu alterius sue utilitatis ac salutis gratia minime a venia et optata misericordia excludatur sed oleo medicamenti salutaris fovendus colligatur quia et justum sic est ut in domo pietatis justo tribuatur dilectio sancte fraternitatis et ad veniam confugienti peccatori non negetur medicamentum indulgentie et salutis Sit autem omnibus ibi advenientibus causa salutis hic et in perpetuum divine miserationis et pietatis refrigerium et Apostolice benedictionis et absolutionis presidium Hanc etiam vobis prerogativam concedimus ut quisquis ad vos alieni Monasterii Monachus pro vite melioratione transierit licenter recipiatur remotis prioris loci querimoniis ut largiente Domino salutis quam querere videtur apud vos potiatur effectu Clericos quoque regulares quos Canonicos vocant qui vel in locis suis salvari non possunt vel pro necessitatibus ad vestra loca humiliter et devote confugiunt suscipiendi et vestrum propositum admittendi Religioni vestre licentiam impartimur Decernimus preterea et omnino constituimus ut predicti loci obeunte Abbate non ibi alius cujuscumque violentia constituatur ordinandus sed ab ipsa Congregatione loci secundum timorem Dei et institutionem Legislatoris Benedicti Pater qui sibi preesse debeat eligatur atque ad eum ordinandum qualiscunque illi placuerit Episcopus advocetur Preterea constituimus et sub anathematis vinculo omnimode interdicimus ut nulli omnino hominum liceat vestrum venerabile Cenobium et loca ei subdita temere perturbare nec aliquas consuetudines novas imponere sed eorum Ecclesie decime possessiones et bona cetera que pro animarum salute jam donata sunt vel in futurum Deo miserante donari contigerit firma vobis omnibusque vestris successoribus et illibata et ab omni exactione injusta quieta et libera in perpetuum permaneant Si qua igitur Ecclesiastica secularisve persona hanc nostram Constitutionem audiens contra eam temere venire tentaverit secundo tertiove commonita si non satisfactione congrua emendaverit potestatis honorisque sui dignitate careat reamque se divino judicio existere de perpetrata iniquitate cognoscat et a Sacratissimo Corpore ac Sanguine Dei et Domini Redemptoris nostri Jesu Christi aliena fiat atque in extremo examine districte ultioni subjaceat Cunctis justa eidem Cenobio servantibus et pacem fidem et dilectionem in veritate exhibentibus sit pax et benedictio Domini nostri Jesu Christi quatenus hic fructum bone actionis percipiant et apud districtum Judicem qui reddet unicuique juxta opera sua premium eterne pacis inveniant Amen Amen Amen Datum Laterani V Idus Januarii Indictione viii