Charter Document - 02184180
| Charter Number: | 02184180 |
|---|---|
| Cartulary Title: | Recueil des Chartes de l'Abbaye de Cluny |
| Charter Language: | Latin |
| Charter Origin: | Religious |
| Charter Type(s): | Agreement |
| Date: | 1155 |
| Date type: | Internal, A.D., Calendar |
| Resource Link(s): |
CCE: cartae cluniacenses electronicae |
Charter:
Notum sit omnibus quod fratres de Miratorio reddiderunt domui Cluniacensi mediantibus dominis Eraclio Lugdunensi archiepiscopo apostolice sedis legato et Henrico Wintoniensi episcopo undecim milia solidorum Lugdunensis monete pro XVII milibus solidorum de quibus domnus papa Cluniacenses ab illis de Miratorio investiri preceperat Pro omnibus decimis quas Ginniacenses exigebant dictum est quod fratres de Miratorio LXX solidos Ledonensis monete eis annuatim persolvant et pro his de his inter eos pax perpetua permanebit De pascuis dictum est quod illi de Miratorio pascua in terris Ginniacensium sine dampno eorum bona fide interveniente habeant Similiter monachi Ginniacenses de propriis animalibus pascua in terris de Miratorio habeant Si quis etiam Ginniacensium aut ab ecclesia illa egressus vel alius quispiam potestati eorum subditus illis de Miratorio dampna vel injurias inferret ipse prior Ginniacensis et alii fratres illum ad restitutionem dampnorum vel injuriarum bona fide compellerent Si vero malefactor ille penitus a potestate Ginniacensi recederet et postea aliquis hominum suorum tam clericorum quam laicorum eundem suscipere vel ipsi auxilium prebere seu eciam consulere causa malignandi reperiretur prior Ginniacensis cum aliis fratribus receptatorem vel consiliatorem illum ad restituenda dampna cohercerent Postquam etiam a potestate eorum foret penitus egressus domini archiepiscopus Lugdunensis episcopus Wintoniensis abbas Cluniacensis prior Ginniacensis et sui ipsum graviter bona fide usque ad satisfactionem persequerentur Similiter illi de Miratorio Ginniacensibus de suis facient De terris vel querelis quas Ginniacenses et fratres de Miratorio habent inter se dictum est quod attestatione bonorum virorum si fieri possit conveniant ut ibi unusquisque jus suum recipiat Si autem inter se in aliquo convenire non possint ante dominos Lugdunensem archiepiscopum et Henricum Wintoniensem episcopum ad terminandam querelam remeent Hoc itaque totum tam Cluniacensis conventus quam Ginniacensis necnon et Miratorii laudaverunt et fieri concesserunt Factum est etiam laudantibus et confirmantibus dominis E[racleo] Lugdunensi archiepiscopo apostolice sedis legato et Henrico Wintoniensi episcopo et Petro Cluniacensi et E[ustorgio] Miratorii abbatibus et G[uidone] priore Ginniacensi quod et omnium sigilla presenti carte inserta declarant Hec autem facta sunt anno ab incarnatione Domini MC quinquagesimo quinto sexto nonas martii confirmata in capitulo Cluniacensi