Charter Document - 02184174
| Charter Number: | 02184174 |
|---|---|
| Cartulary Title: | Recueil des Chartes de l'Abbaye de Cluny |
| Charter Language: | Latin |
| Charter Origin: | Papal |
| Charter Type(s): | Mandate |
| Date: | 1154 |
| Date type: | Assigned |
| Resource Link(s): |
CCE: cartae cluniacenses electronicae |
Charter:
Anastasius Episcopus servus servorum Dei dilectis filiis Petro Abbati et universo Capitulo Cluniacensi salutem et Apostolicam benedictionem Ex Apostolice Sedis consueta clementia et Bono qui de conversatione antecessorum vestrorum diffusus est odore accidisse dignoscitur ut et petentem Ecclesiam vestram sacrosancta Romana Ecclesia de facili exaudiret et non petenti etiam bona data sicut speciali filie gratuito ministraret Referentibus autem quibusdam religiosis viris accepimus te dilecte in Domino fili Abbas unde plurimum admiramur Prioratus et quosdam reditus pertinentes ad mensam conventus in quasdam personas partim commendatione partim donatione absque fratrum tuorum consilio et conventus contulisse in dilectum videlicet filium nostrum P Viseliacensem Abbatem Prioratum Silviniaci in Abbatem Clusinum Prioratum Cariloci et in Archidiaconum Lugdunensem Prioratum de Vilereis Magistro preterea W Mutim decem libras in capella burgi Cluniacensis et Magistro O Eduensi decem libras in Prioratu de Magobrio diceris contulisse Quoniam igitur nos tanto minus patimur Ecclesiam vestram bonorum suorum diminutionem et dispendium sustinere quanto ad exaltationem ejus antecessores vestros attentius conspicimus desudasse per presentia vobis scripta mandamus quatinus omnes illos redditus et Prioratus quos non communi vestro consilio aut consensu concessos esse constiterit ad usus et manus vestras quam citius revocetis et in pristinum statum universa que illicite sunt concessa reducatis Nos siquidem hujusmodi concessiones auctoritate Apostolica vacuamus et redditus vestros maxime autem illos qui mense vestre deputati noscuntur nolumus ad alienos usus irrationabiliter intorqueri sed in statu suo immobiles precipimus conservari et ne a modo dilecte in Domino fili Abbas tale aliquid de Prioratibus aut reditibus ipsis attentare presumas auctoritate Apostolica inhibemus alioquin indignationem nostram et gravem officii tui jacturam te timeas incursurum Successoribus autem tuis omnem penitus auferimus facultatem redditus ad mensam fratrum hactenus deputatos ad usus alios absque ipsorum conniventia inflectendi Datum Laterani Kalendis Maii