Charter Document - 02184167

In nomine sancte et individue Trinitatis Fridericus divina favente clementia Romanorum rex augustus Si religiosorum vota et peticiones clementer admittimus et ad cultum divine religionis gratiosum favorem eis impendimus tam temporalis quam eterne beatitudinis premia felici commertio nobis contrahere non ambigimus Ea propter omnium tam presentium quam futurorum sollers noverit industria qualiter nos ob reverentiam et peticionem dilecti nostri Petri venerabilis Cluniacensis abbatis statutum donationis quod Cluniacensi ecclesie de Balmensi cenobio cunctisque possessionibus ad ipsum locum pertinentibus collatum est a reverendo videlicet patre nostro papa Eugenio tercio necnon ab Humberto Bisuntine ecclesie venerabili archiepiscopo seu a Willelmo Burgundie preclaro comite nos quoque regia auctoritate corroboramus et confirmamus et pagine presentis privilegio in eternum valituro de nostro ac regni dominio in Cluniacensis monasterii et abbatum ipsius dominium transactamus salvo tamen jure quo regno eadem Balmensis ecclesia subjecta esse cognoscitur Regia nichilominus auctoritate precipimus ut eadem ecclesia nullum advocatum habeat nisi quem Cluniacensis abbas eligere voluerit et ut omnia firma et inconcussa pace retineat quecumque temporibus Alberici abbatis possedit vel que eo tempore possidebat quo eam Cluniacensis abbas regendam suscepit Jubemus etiam ut quicunque ex jure Balmensi abbati olim hominium faciebant Cluniacensi abbati absque ulla contradictione modo similiter faciant Ipsam quoque Balmensem ecclesiam et omnia ad eam pertinentia ob salutem anime nostre et omnium parentum nostrorum in tuicionem nostram suscipimus regia auctoritate prohibentes ne aliqua magna seu parva persona ab hominibus ejusdem ecclesie districtum vel aliquam exactionem exigat nec Balmenses monachos a perquirendo jure suo in propriis possessionibus impedire presumat Ex quibus quasdam propriis necessarium duximus exprimendas vocabulis monasterium videlicet Sancte Marie Grandifontis cum omnibus appendiciis suis monasterium Sancti Petri Gaude cum omnibus appenditiis suis monasterium Sancte Marie infra urbem Bisuntinam quod vocatur Jussanum cum omnibus appendiciis suis monasterium Sancti Eugendi Ethice monasterium Sancti Lauteni monasterium Sancti Desiderati Ledonensis cum omnibus appendiciis ipsorum Mulnet Crancet Noviacum Biviliacum Sabonarie Alafrautam Sanctus Mauricius Sanctus Renebertus monasterium Sancti Stephani de Ponte monasterium Sancte Angnetis Sisinciacum Capellam Beneventum monasterium Sciense monasterium de Dola monasterium Strabonense Que omnia cum reliquis acquisitis vel acquirendis Balmensi ecclesie et per eam Cluniacensi regia auctoritate confirmamus et in perpetuo possidenda contradimus Adicientes ut nullus hujus nostre traditionis statutum infringere presumat Si quis autem in aliquo temere contraire temptaverit regio banno subjaceat et mille libras auri camere nostre persolvat Et ut hec omnia eternaliter rata et inconvulsa permaneant presentem paginam sigilli nostri impressione insigniri jussimus Testes interfuerunt quorum nomina subscripta cernuntur Arnoldus Coloniensis archiepiscopus Gunterus Spirensis episcopus Conradus Wormaciensis episcopus Anselmus Havelbergensis episcopus Conradus Augustensis episcopus Wibaldus Corbiensis atque Stabulensis abbas Henricus dux Saxonie Henricus dux Bavarie Bertoldus dux Karinthie Teodus comes Hollandie Heremannus palatinus comes Hugo comes de Tagesburch Signum domni Friderici Romanorum regis invicti Ego Arnoldus cancellarius recognovi Datum Wormatie anno Dominice incarnationis MCLIII indictione I III idus junii regnante domino Friderico Romanorum rege glorioso anno vero regni ejus II in Christo feliciter Amen