Charter Document - 02184163

Eugenius episcopus servus servorum Dei venerabili fratri [Humberto] Lugdunensi archiepiscopo salutem et apostolicam benedictionem Nequitia illorum qui apud Gigniacum vitam monasticam nomine tenus profitentur operis vero exsecratione blasphemant et quanta vesania in dilectos filios nostros de Miratorio et bona eorum per multa sint annorum curricula debacchati eo plenius ad notitiam fraternitatis tue devenit quo loca ipsa propinquiora tibi consistant Sane tam a nobis quam a felicis memorie papa Innocentio predecessore nostro multa diligentia est adhibita ut redirent ad cor et a predictorum filiorum nostrorum molestatione cessarent Ipsi vero pleni sordibus tanquam sub cinerei ejus panis qui non reservatur fas et nefas pariter confundentes nec periculum animarum suarum nec opprobrium ordinis nec reverentiam hominum nec timorem Dei ante mentis oculos revocaverunt sed conversi in arcum pravum et transeuntes in affectum cordis post factam etiam inter eos per charissimum filium nostrum Bernardum Clarevallensem et Petrum Cluniacensem abbates concordiam solito furore arrepti addiderunt deteriora prioribus et in prefatos filios nostros barbaricam rabiem exercentes tam per se quam per quosdam ministros diaboli quorum suffragia mendicarent personas eorum pervertere bona diripere domos subvertere aliaque furoris indicia in eos non dubitaverunt ausu diabolico exercere Cum vero ab Ecclesie corpore jam diu meruissent apostolica securi precidi usque modo sustinuimus credentes eos aliquando reversuros ad cor et a predictorum filiorum nostrorum persecutionibus cessaturos Quia vero jam ita putruerunt in stercore suo ut nisi Jesus magnam vocem emittat non credantur de fetore sepulcri aliquatenus extrahendi fraternitati tue per presentia scripta mandamus quatenus eos cum omni districtione commoneas ut predictis filiis nostris omnia ablata restituant irrogata damna resarciant de injuriis plenam satisfactionem exhibeant et ab ipsorum de cetero infestatione desistant Si vero infra viginti dies post commonitionem tam hec omnia effectui mancipare contempserint nos in loco ipso et in omnibus cellis et ecclesiis ejus divina extunc officia interdicimus Willelmum priorem Ricardum hospitalarium Poncium decanum Hugonem Guillelmum Cotarellum et alios qui caput sunt hujus nequitie atque omnes qui in hoc maleficio consentiunt excommunicationi subjicimus addentes ut illi et qui consilium aut auxilium ei ministrare presumpserint eadem sententia teneantur Sane pro hac denuntianda sententia cum a dilecto filio nostro abbate de Miratorio fueris requisitus cum venerabili fratre nostro [Humberto] archiepiscopo Bisuntino convenias et congregato cetu ecclesie candelis accensis sententiam istam publice nuntiare et irrefragabiliter ab omnibus observari precipiatis