Charter Document - 02184128
| Charter Number: | 02184128 |
|---|---|
| Cartulary Title: | Recueil des Chartes de l'Abbaye de Cluny |
| Charter Language: | Latin |
| Charter Origin: | Papal |
| Charter Type(s): | Mandate |
| Date: | 1147 |
| Date type: | Internal, A.D., Calendar, Papal |
| Resource Link(s): |
Reference Document for this Embedded Document CCE: cartae cluniacenses electronicae |
Charter:
Eugenius Episcopus servus servorum Dei dilectis filiis Petro Cluniacensi Abbati ejusque fratribus tam presentibus quam futuris regularem vitam professis in perpetuum Que ab Ecclesie Dei fidelibus pro animarum suarum salute ad Religiosorum sustentationem rationabili providentia statuuntur in sua volumus stabilitate persistere et ne pravorum hominum valeant imposterum refragatione turbari congrua nos convenit sollicitudine providere Sicut per scriptum nobilis viri Guillelmi Matisconensis Comitis quod nostro conspectui obtulistis ejusdem sigillo impressum agnovimus idem Vvillelmus Comes partim dono pro anime sue et parentum suorum salute partim venditione possessionem quamdam cum suis appendiciis in burgo Ledonis que vulgo Baerna Monteria vocatur que erat Haimonis Ledonensis prepositi et Burgensem quemdam ejusdem possessionis custodem [data ei concorditer in Concambio alia Baerna Monteria] vobis vestrisque successoribus in perpetuum libere habendam concessit Vos vero pro tanto beneficio sexdecim millia solidorum Cluniacensis monete et quatuor mulas ei dedistis Cui nimirum donationi et venditioni Pontia Comitissa uxor ipsius Comitis Stephanus et Girardus filii eorum prefatus Haimo prepositus mater ejus et fratres Gualterius vice Comes Frontoniaci et omnes alii qui in ea possessione aliquid juris videbantur habere assensum communiter prebuerunt Quod ut firmiori stabilitate subnixum consisteret ipse quoque Vvillelmus Comes et prefata uxor ejus et filii et omnes alii supradicti juramento firmarunt eo videlicet tenore quod hujus concessionis in perpetuum bona fide auctores et defensores existerent si quis vero calumniam facere aut damnum inferre tentaverit ipsi pro posse suo concessionem ipsam per omnia tuebuntur Proceres quoque terre ejusdem Comitis Hugo videlicet de Berziaco Henricus Grossus et Joceranus frater ejus Guillelmus de Neblens Paganus de Classiaco Bernardus Paganus Mayolus Rabutinus et Stephanus de Balsinens juraverunt quod si predicta pactio non teneretur aut aliquo casu infringeretur commoniti a fratribus Cluniacensibus Matisconam venirent et ibidem obsides manerent donec re pacificata cum licentia Abbatis Clun redirent Guido insuper de Munet Guillelmus Joret Guido de Laisiaco et plures alii qui in scripto predicti Comitis continentur in Burgum Ledonis se obsides venturos quemadmodum alii supradicti nihilominus juraverunt Hanc itaque donationem seu venditionem dilecti in Domino filii vobis vestrisque successoribus et per vos Cluniacensi Monasterio in quo divino mancipati estis obsequio auctoritate Apostolica confirmamus et futuris perpetuo temporibus ratam manere decernimus Prohibentes ut nulli omnino hominum liceat Cluniacense Monasterium super eadem possessione temere perturbare aut aliquibus molestiis fatigare sed integra et ab omni in petitione libera conservetur eorum pro quorum gubernatione et sustentatione concessa est usibus omnimodis profutura Si qua igitur in futurum Ecclesiastica secularisve persona hanc nostre confirmationis paginam sciens contra eam temere venire tentaverit secundo tertiove commonita si non satisfactione congrua emendaverit potestatis honorisque sui dignitate careat reamque se divino judicio existere de perpetrata iniquitate cognoscat et a sacratissimo ac sanguine Dei et Domini Redemptoris nostri Jesu Christi aliena fiat atque in extremo examine districte ultioni subjaccat Conservantibus autem sit pax Domini nostri Jesu Christi quatenus et hic fructum bone actionis percipiant et apud districtum judicem premia eterne pacis inveniant Amen Ego Eugenius Catholice Ecclesie Episcopus Ego Albericus Ostiensis Episcopus Ego Imarus Tusculanus Episcopus Ego Hubaldus Presbyter Cardinalis tit SS Joannis et Pauli Ego Guido Presbyter Card tit S Laurentii et Damasi Ego Hugo Presbyter Cardinalis in Lucina Ego Aribertus Presbyter Card tit S Anastasie Ego Julius Presbyter Card tit S Marcelli Ego Guido Presbyter Card tit Pastoris Ego Jordanus Presbyter Card tit sancte Susanne Ego Otto Presbyt Card S Georgii ad velum aureum Ego Joannes Paparo Diaconus Card S Adriani Ego Gregorius Diaconus Card S Angeli Ego Joannes Diaconus Card S Marie nove Ego Guido Diaconus Card S Marie in Porticu Ego Hyacintus Diac Card S Marie in Cosmedin Datum Altisiodori per manum Guidonis S R Ecclesie Diaconi Cardinalis et Cancellarii VIII Kalendas Septembris Indictione X Incarnat Dominice anno MCXLVII Pontificatus Domni Eugenii tertii Pape anno III