Charter Document - 02184119
| Charter Number: | 02184119 |
|---|---|
| Cartulary Title: | Recueil des Chartes de l'Abbaye de Cluny |
| Charter Language: | Latin |
| Charter Origin: | Papal |
| Charter Type(s): | Mandate |
| Date: | 1147 |
| Date type: | Assigned |
| Resource Link(s): |
CCE: cartae cluniacenses electronicae |
Charter:
Eugenius Episcopus servus servorum Dei nobili viro G Matisconensi Comiti salutem et Apostolicam benedictionem Quam proprie et specialiter Cluniacense Monasterium ad sanctam Romanam spectet Ecclesiam quantumque jam per Dei gratiam in religione profecerit quot etiam sue bone conversationis exemplo ad bene vivendum instruxerit universus fere mundus recognoscit Quod nos diligentius attendentes pro execrabili et horrendo facinore et inaudito sancte Romane Ecclesie contemptu que in dilectum filium nostrum Magistrum Osbertum ad ignominiam beati Petri et nostram Balmenses Monachi ausu sacrilego commiserunt loco ipsi nomen et dignitatem Abbatie in perpetuum abstulimus eumque dilecto filio nostro Petro Cluniacensi Abbati ejusque successoribus interventu fratrum nostrorum in Prioratum ordinandum et disponendum ex Apostolica benignitate commisimus Per Apostolica itaque scripta nobilitati tue mandamus atque in peccatorum remissionem injungimus quatinus locum ipsum cum thesauro et bonis suis omnibus et pertinentiis fratribus Cluniacensibus cum integritate assignes Monachos exinde expulsos ad eorum obedientiam revoces et quibuscumque modis secundum Deum poteris fratrum Cluniacensium paci et tranquillitati provideas Datum Parisius IV Kalendas Junii