Charter Document - 02184076
| Charter Number: | 02184076 |
|---|---|
| Cartulary Title: | Recueil des Chartes de l'Abbaye de Cluny |
| Charter Language: | Latin |
| Charter Origin: | Royal |
| Charter Type(s): | Decree |
| Date: | 1143 |
| Date type: | Internal, Calendar |
| Resource Link(s): |
CCE: cartae cluniacenses electronicae |
Charter:
Cum Scriptura nos omnibus bonum facere moneat ecclesiis et ecclesiasticis viris veris Dei cultoribus est elemosina precipue largienda juxta illud Apostoli Dum tempus est operemur bonum ad omnes maxime autem ad domesticos fidei Hujus rei gratia ego Adefonsus imperator Hispanie una cum uxore mea Berengaria grato animo voluntate spontanea pro mea parentumque meorum salute pro peccatorum nostrorum remissione Cluniacensi ecclesie in honore beati Petri fundate et ejusdem ecclesie abbati domno Petro monachisque omnibus Deo ibi militantibus eorum[que] successoribus in perpetuum ecclesiam Sancti Vincentii de Salamantica cum omnibus ejus hereditatibus vel a me vel ab aliis ei datis ejusdem ecclesie priore domno Alvito domnoque Berengario ipsius civitatis episcopo suggerentibus et concedentibus jure hereditario dono et hereditariam eis in perpetuum habendam concedo Ita inquam predicte Cluniacensi ecclesie et predicto abbati domno Petro ecclesiam Sancti Vincentii prenominatam dono quatenus canonicalem habitum qui modo ibi habetur in habitum monacalem transvertat et eidem ecclesie ac ejus possessionibus ut pater et dominus semper disponat et semper provideat Si qua autem ecclesiastica secularisve persona huic mee donationi contrarius in posterum venerit et eam diruperit ab omnipotente Deo maledictus in inferno cum Juda proditore dampnetur nisi resipuerit insuper pro temerario ausu hereditate Cluniacensi ecclesie duplata regie potestati mille marcas pectet argenti Facta carta Najare IIII kal novembris era MCLXXXI predicto imperatore Adefonso imperante in Toleto Legione Sarragocia Najara Castella Galecia Ego Adefonsus imperator hanc donationem quam in manu domini Guidonis Romane ecclesie cardinalis et legati Cluniacensi ecclesie de predicta ecclesia Sancti Vincentii facio Deo auctore confirmo et firmam et stabilem omni tempore esse concedo Signum imperatoris Ego Berengaria imperatrix confirmo Ego Sancius imperatoris major filius confirmo Ego Raimundus Toletanus archiepiscopus confirmo Ego Petrus Compostellanus archiepiscopus confirmo Ego Petrus Secoviensis episcopus confirmo Ego Petrus Palentinus episcopus confirmo Ego Bernardus Sagontinus episcopus confirmo Ego Berengarius Salamantinus episcopus confirmo Ego Stephanus Oxomensis episcopus confirmo Rodericus Gomez comes confirmavit Poncius de Cabreria comes confirmavit Guterrus Fernandez confirmavit Rodericus Fernandez confirmavit Didacus Munioz majordomus imperatoris confirmavit Garsias Royz majorinus imperatoris in Burgis confirmavit Geraldus scripsit jussu imperatoris et magistri Hugonis ejus cancellarii